C Lalrosanga'n Mizoram leh hmarchhaka Health care duhkhawp lohna sawi chhuak

Parliamentary Standing Committee on Health and Family Welfare chu nimin khan Delhi-ah an ṭhukhawm a, Lok Sabha MP C Lalrosanga chuan Mizoram leh hmarchhak state hrang hranga Central Government Health Scheme (CGHS) hman dan chungchanga duhkhawp lohnate a sawi chhuak.

C Lalrosanga chuan, Mizorama central sorkar hnathawk leh pension tawhte'n an dam loh nikhua-a private hospital-a CGHS an hmana an hlawkpui ve theihna tura ruahmanna siam rang turin Health and Family Welfare Ministry a ngen.

CGHS hmang hian sorkar enkawl loh damdawi-in dangahte pawh man tlawm zawka damlote enkawl an nih theih nan CGHS huamtir (empanel) a ngai tih sawiin C Lalrosanga chuan, "Hmarchhaka sorkar hnuaia mi ni lo damdawi-in ten he scheme hi an hman duh huna empanel an nih nan CGHS hnuaia damlo enkawlna leh damdawi mante tipung tura ennawn a ṭul," a ti.

Hmarchhak biala Central sorkar hnathawk laite leh pension tawhte Guwahati AIIMS damdawi-ina sumfai pe loa enkawl an nih ve theihna tur (cashless facility) ruahmanna siam tura thuneitute chu nawrin C Lalrosanga chuan, CGHS aṭanga damdawi pekchhuah ṭhenkhat a ṭha tawk lo a ni tih a sawi a, damdawi ṭha chauh leia pechhuak ṭhin turin sorkar hotute chu a ngen nghal.

Lok Sabha MP hian hmarchhak state-te zinga CGHS Wellness Centre la awm lohna Arunachal Pradesh khawpui Itanagar-ah pawh din ve thuai a ṭul thu a sawi bawk.