Zirlaite tan hnam làm intihsiak buatsaih

School Education department, Tourism department, Mizoram State Spots Council (MSSC) leh Mizo Cultural Organisation (MCO)-te chuan nimin khan Vanapa Hall-ah 'Zirna In Pual Mizo Hnam Làm Intihsiak' an buatsaih a, vawiinah chhunzawma zawh a ni ang.

Intihsiak hi hlawm pathum - college/university, high school/higher secondary school leh middle school-ah ṭhen a ni a, tel turin zirna-in 70 aṭangin hming an pe lut. College/university zirlaite chu Cheraw (Kântluang) leh Chheihlàm hmangin an intihsiak a, HS/HSS zirlaite chu Cheraw (Kântluang) leh Sarlàmkai hmangin an intihsiak a, M/S zirlaite chu Cheraw (Kântluang) leh Chawnglaizawn hmangin an intihsiak a ni.

Hlâwm ṭhen tina pakhatnate'n Rs 50,000, pahnihnate'n Rs 30,000 leh pathumnate'n Rs 20,000 an dawng dawn a; pakhatnate chu a thlàwnin Thenzawl Golf Course fanpui an ni bawk ang.