Cyber Crime Police Station-ah thubuai 247 ziah luh a ni tawh

Mizoram Police hnuaia Cyber Crime Police Station chuan a din tirh aṭanga July 2023 tawp thleng khan thubuai 247 an ziak lut tawh a, mi 47 an man tawh.

Home minister Lalchamliana'n tun hnaia press conference a neiha a tarlan danin, Cyber Crime PS chuan November 27, 2020-a police station puitlinga hlan kai a nih aṭanga July 2023 thleng khan thubuai 247 an ziak lut tawh aṭangin mi 47 an man tawh a, pawisaa inbumnaah Rs 24,39,755 an hmu lêt tawh a ni.

November 4, 2022 khan Crime and Economic Police Station hawn a ni bawk a, CID (Crime)-in an enkawl. Crime and Economic PS hian thubuai 10 an ziah luh tawh thu Lalchamliana chuan a sawi.

Lalchamliana chuan, August 26, 2022 khan police station 40 leh outpost 13-ah closed circuit television (CCTV) vuah a nih thu sawiin, "Mizoram Police-in Crime and Criminal Tracking Network System (CCTNS) chak takin a bawhzui a, kumin July thla thleng khan Mizoram hmun hrang hranga pawikhawihna thubuai 39,500 chu State Data Centre-ah khung a ni," a ti a; Mizoram chu India rama tlang ram state 10 zingah CCTNS-a ti ṭha pathumna a nih mek thu a sawi.