KHAWTHLIR

CM-in enfiah

Chief minister Zoramthanga chuan nimin zing khan Laipuitlang, Ramhlun Venglai, Ramhlun Vengthar, Ramhlun North leh Ramhlun Sports Complex-te a tlawh a, khawtlang hruaitute'n an veng mamawh hmasawnna tur sorkara an dil hmunhmate a enfiah. CM hi MLA Ramthanmawia'n a ṭawiawm a ni.

Thisen pe

Mizo Manchester United Supporter's Club chuan an din champha pualin nimin khan Civil Hospital, Aizawl Blood Centre-ah thisen pek an huaihawt a, thisen unit 64 an pe a, petute mipa 59 leh hmeichhia panga an ni.

Lehkhabu tlangzarh

Deputy chief minister Tawnluia chuan Planning Board vice chairman H Rammawi ziah, ‘Agriculture study tour leh a kaihhnawih’ tih lehkhabu nimin khan Land Resources, Soil & Water Conservation department conference hall-ah a tlangzarh. Tawnluia chuan, SEDP thil tum ber chu Mizoram leilung hausakna hmanga horticulture, ran vulh, thlai leh thei hmanga intodelh a nih thu a sawi.

Media awareness

MJA, Lawngtlai district leh Lawngtlai District Election Office chuan nimin khan Lawngtlai Press Club-ah political party-te leh an media cell-te tan 'Media awareness campaign' an buatsaih. Chawhmaah Lawngtlai MJA general secretary Lalchharliana leh chawhnuah vice president Elvis Lalthangzuala ten an kaihruai a; DEO official leh Lawngtlai MJA President Lalngheta Ralte ten thil pawimawh an sawi a, political party aiawhte'n an ngaihdan leh duh dante an sawi bawk.

Dawhkan sem

Aizawl North-III bialtu MLA C Lalmuanpuia chuan nimin khan a bial chhunga Chanmari West-ah kawngsira chawhmeh zuartu mi 10 hnenah Aizawl Smart City Ltd. kaltlanga duan chawhmeh zawrhna dawhkan, Street Vendor Modular Kiosk a sem.