Kawng chhiat vangin kawng dan a ni: Bawrhsap ngenna vangin an titawp rih

Kolasib District Driver's & Welfare Joint Action Committee (JAC) chuan an district-a NH-6 kawngpui a chhiat em avangin nimin zing dar 6 aṭang khan an district chhung hmun pali-ah national highway kawngpui an dang. Kolasib bawrhsap John LT Sanga hoa an inbiak hnuah nimin chhun dar 1 khan kawngpui dan an titàwp leh nghal.

Kolasib District Drivers & Welfare JAC tarlan danin, August 31, 2023 khan NH-6 kawngpui chhia chu a hmunah an enfiah a; kawng thawm ṭhat hna thawktute hnena rang taka kawng siam tura an lo ngen tawhnain awmzia a nei lo tih an hmuh avangin emergency meeting an nei nghal a, kawngpui dang turin thutlukna an siam a ni.

Thutlukna an siam tawh angin nimin zing dar 6 aṭangin hmun pali - Vairengte, Rengtekawn, Khuangpuilàm leh Kawnpuiahte NH-6 kawngpui an dang a; lirthei tam tham tak kawngpui dungah an ding hman.

Kolasib District Drivers & Welfare JAC hruaitute chu Kolasib DC John LT Sanga nen an inbia a, an inbiak zawh hnuah Bawrhsap ngenna angin nimin chhun dar 1 khan kawngpui dan an titawp ta rih a ni.

Vawiin tlai dar 3 hian Kolasib DC conference hall-ah Bawrhsap leh NHIDCL hotute nen an inbiak leh dawn thu tarlangin Kolasib District Drivers & Welfare JAC chuan, "Meeting rorêl azirin a ṭul anga hmalak leh a ni ang," an ti.