CM-in ICFAI University hun a hmanpui

Institute of Chartered Financial Analysts of India (ICFAI) University, Mizoram chuan nimin khan an auditorium-ah Freshers' Social an hmang a; khuallian chief minister Zoramthanga hnenah tun hnaia Mizoram chhehvela Mizote'n harsatna an tawhnaah kawng hrang hranga a thawh ṭhat avangin chawimawina an hlàn.

CM Zoramthanga chuan, India sorkar leh MNF-in inremna an siamah university din a tel tih sawiin, "State sum aṭanga hetiang zirna-in lian leh ṭha din hi a hautak em em. Kan inremna ang ngeiin Mizoram University ṭha tak kan nei ta a, tunah phei chuan India ram huapa zirna-in ṭha a lo tling ta hial a, kan chhawr em em a ni," a ti.

MZU-in mamawhna a dâwl zo lo tih sawiin Zoramthanga chuan, "Tihlen zel tumin hma pawh kan la mek a, university seat mamawhna a sàn em em laiin ICFAI University a rawn lang a, sorkarin phalna pein in han indin a, kan ramin kan chhawr em em che u a, Mizoram tan in ṭangkai em em a ni," a ti a; zirlaite chu chhungkua, ram leh hnam tana mi ṭangkai tak nih tum turin a fuih.

ICFAI University registrar Dr David Lawmzuala chuan, New Education Policy 2020 zuiin kumin aṭangin zirna kalhmang an thlak vek thu a sawi a, "Programme course 12 kan kalpui mek a, kumin aṭangin Ph.D a zir theih tawh dawn. Zirlai lut tharte hi kawng laka pilbo mai lo a, ṭha taka an zirlaite zo ngei turin kan beisei," a ti.

Mizoram Legislative Assembly-in a pawm ICFAI University Mizoram Act, 2006 Section 4(2) behchhanin ICFAI University, Mizoram hi din a ni a, Chaltlangah mimal in luahin bul an ṭan. Kum 2011 aṭangin Durtlang North-a an campus-ah an insawn a; assistant professor 28, guest lecturer 30, thawktu dang 34 leh zirlai 630 an awm mek a ni.