Zirna-in pual hnam làm intihsiak zo

School Education department, Tourism department, Mizoram State Sports Council leh Mizo Cultural Organisation (MCO)-te'n Vanapa Hall-a ‘Zirna-in pual Mizo hnam làm intihsiak’ an buatsaih chu nimin khan zawh a ni a; Aizawl College, Home Mission HSS leh Reiek Middle School-te pakhatna an ni.

August 31, 2023-a ṭan hnam làm intihsiakah hian zirna-in 56 an tel a, hlawm pathum - college/university, high school/higher secondary school leh middle school-ah ṭhen a ni. Hlawm ṭhen tinah pakhatnain Rs 50,000, pahnihnain Rs 30,000 leh pathumnain Rs 20,000 ṭheuh an dawng a, pakhatna ṭheuhte hi a thlàwnin Thenzawl Golf Course fanpui an ni ang.

Nimin tlaia a khàrna inkhawma khuallian, School Education minister Lalchhandama Ralte chuan, hnam làm intihsiak chu kum dangah pawh Organising Committee-in an buatsaih leh dawn phawt chuan School Education department chu intihsiaknaah uar lehzuala tel turin an inpeih reng thu a sawi.

Lalchhandama Ralte chuan, "Kan ṭhalaite'n kan hnam làm hrang hrangte kan hnam incheina nena an han lantir thei hi a lawmawm," a ti a; New Education Policy duh dan angin ram leh hnam nunphung (culture) chawi nunga tivul zel turin zirlaite a fuih.

Khualzahawm Tourism minister Robert Romawia pawhin thu sawiin, "Kan hnam, kan culture kan vawn nun zel nana hetiang hnam làm intihsiakna buatsaih a ni hi a lawmawm tak zet," a ti a; chhunzawm zel a nih theih nan ngaihtuahna séng turin MCO hruaitute a chah.