Lumpsum HSS-te la khâr zui zel

Mizoram Govt. Lump­sum Aided Higher Secondary School Asso­ciation (MIGLAHSSA) chuan adhoc grant-in-aid dinhmuna dah an phût avanga August 29, 2023 aṭanga tiam chin awm loa sikul pakua an khâr chu an la chhunzawm zel.

Lumpsum aided higher secondary school awmna khaw ṭhenkhata joint action committee-te chuan MIGLAHSSA hmalakna an thlàwp thu nimin khan an puang.

Tarlan tawh angin, MIGLAHSSA hian an sikul, lumpsum grant-in-aid dinhmuna awm mekte chu adhoc grant-in-aid ah hlan kai an phût a; August 28, 2023-a No Teaching Day an hman hnuah August 29 aṭang khan tiam chin awm loin an sikulte an khâr a ni.

Lumpsum aided HSS awmna Phullen JAC chuan August 31, 2023 khan resolution an siam a, "Kum 20 chhung teh meuh khawtlangin harsa taka a lo enkhawl hram hram Phullen HSS hi sorkarin min chhâwk ve tawh rawh se," an ti a; kum 2008-a lumpsum grant-in-aid ni tawhte leh kum 2018-a lampsum aided ni ve chauhte nen hrût rual an duh loh thu an tarlang.

Phullen JAC chuan, "Sorkarna chelh mektute'n min tiam tawh angin tuna an hun chhung ngei hian adhoc grant-in-aid min pe rawh se," an ti a; "Kan sikul hi adhoc status-a min hlàn kai loh chuan sikul khâr chhunzawm leh a tul dan ang zela hmalak chhunzawm a ni ang," an ti bawk.

Lumpsum HSS awmna Thingsulthliaha tlawmngai pawl leh political party hrang hrang office bearer-te nimin zinga ṭhukhawm pawhin resolution an siam a, "Thingsulthliah HSS hi kan sorkar hotute'n kum 2018 MLA inthlan dawna min tiam ang ngei khan an term chhung ngei hian adhoc grant-in-aid ah min hláng turin kan phût tlat. Kum 20 chhung khawtlangin kan lo hahpui tawh hi an sawi anga min phurh chhâwk ve tawh turin kan ngen nawn leh a ni," an ti a; MIGLAHSSA hmalakna an thlàwp thu an tarlang.

Lumpsum HSS awmna khaw dang NE Khawdungsei JAC pawhin thuchhuah an sia a; tuna sorkar mek hotute'n kum 2018 MLA inthlan dawna an tiam ang ngeiin an khaw HSS chu adhoc grant-in-aid ah hlàn kai an phût thu leh hlàn kai a nih theih nan theihtawp an chhuah zel dawn thu an tarlang a ni.