Engtik lai pawhin ZPM-ah hmun a awm - Lalduhoma

ZPM leader Lalduhoma chuan, ZPM party a vul mek nia sawiin, mi tin tan engtik lai pawhin ZPM-ah hmun a awm reng thu a sawi.

Lalduhoma hian August 31, Ningani khan Hnahthiala vantlang inkhawmah thu sawiin, "Tunlai hi SEDP sem hun lai a ni a, ruling party-ah lo chuan mi thar neih a harsa em em. Chuti chunga mi thar ṭha tak tak kan nei zel hi Pathian hnathawh tih loh rual a ni lo. Sorkara beisei la nei mekte pawh kan lo nghak mek che u a, ZPM-ah engtik lai pawhin in tan hmun a awm reng a ni," a ti.

Engkim tan hun ruat a nih thu sawiin Lalduhoma chuan, "Khawvel ram ropui leh sorkar thil ti thei ber berte pawh an lo tluchhe tawh ṭhin a, ram thar, sorkar thar ropui tak tak a lo ding tawh ṭhin. Kan ram pawh hi han thlir ila, vawiinah chuan ZPM party a vul chho mek tih hi hai rual a ni lo," a ti a; party dangte beih rawn ngai khawpin ZPM party a ṭhang lian tawh niin a sawi.

ZPM Leader chuan, ṭhalaite hmasawn nan theihtawp an chhuah dawn tih sawiin, "ZPM vote kher a ngai lo ti tute hian an hre sual a ni. Tun inthlanpuia ZPM a sorkar loh chuan ram mipuite hi kan dinhmun ngaiah kan ding leh ngei dawn a, chuvangin, ZPM nih kher a ngai a, a ṭul em em bawk," a ti.

South Tuipui biala ZPM-in candidate atana an ruat Jeje Lalpekhlua pawhin thu sawiin, South Tuipui bial hre chiangtu a nih thu leh amah aia hmangaihtu an awm a rin loh thu a sawi a, politics hausakpui tura candidate ni ta a nih loh thu te, Mizoram hmasawnna tura thawk tur leh a bik takin South Tuipui bial hmasawnna tura ding chhuak a nih thu a sawi bawk.

ZPM Southern Hqrs. president Lalrinpuii, Lunglei East biala ZPM candidate tur chuan Rotlang East khuaah thu sawiin, "Rotlang East khua hi khaw taima leh inlungrual tak in ni a, mi taima leh ti tak tak peih tan ZPM sorkarah beiseina kawl a êng ngei dawn a ni," a ti a; ZPM an sorkar chuan Tuipui panna kawng chu ṭha taka siam a nih tur thu a sawi.

Hnahthiala vantlang inkhawmah hian South Tuipui bial khaw hrang hrang aṭanga ZPM zawm thar voter 1,096 lawm luh an nih thu ZPM thuchhuah chuan a tarlang.