Mizoram tana ṭha ber turin Pathianin MNF a sorkartir - MLA Zothantluanga

MNF party chuan nimin khan Mizo Hnam Runah chhung inkhawm an nei a; thusawitu MNF adviser Zothantluanga, MLA chuan, Mizoram tana ṭha ber turin Pathianin MNF a sorkartir niin a sawi.

Zothantluanga chuan, "Pathianin Zoram tana ṭha ber turin hun khirh takah MNF a sorkartir a, sorkar ṭha nei turin Pathian hnenah kan ṭawngṭai a, Pu Zoramthanga sorkar a lo piang. Hun khirh tak, Covid leh ramri buai, ṭhenawm buaite hi mihringin kan hre lâwk lo a, Pathianin a hre lâwk a, MNF min sorkartir a ni," a ti.

MNF sorkarah buhfai leh gas a hnianghnar a, oil-ah harsatna lian tham a thleng lo nia sawiin Zothantluanga chuan, "Kawngpui ṭha kan neih theihna turin harsatna nei ṭhin mah ila, MNF kaihhruai sorkarah chuan kawng ṭha kan nei ngei dawn a, hmun tinah hun rei lo têah kan kal thei tawh dawn a ni," a ti a; zirna lamah pawh nasa takin hmasawnna a thlen thu a sawi.