Rel kawng lei chima chhanchhuah hna thawktute chawimawina hlân

Home minister Lalchamliana hoin nimin khan Taxation Auditorium-ah Sairang Kurunglui chunga rél kawng tur lei dawh lai chima chhanchhuah hna leh ruang senghawi hna thawktute'n an hnathawh dan sawihona (debriefing) an nei a; chhanchhuah hna leh ruang senghawi hna thawktute hnenah chawimawina hlan a ni.

Chawimawina dawngtute chu - Aizawl District Disaster Management Authority, Quick Response Team, Aizawl SP, Aizawl Traffic SP, Forensic Science Laboratory, Aizawl West Chief Medical Officer, Aizawl Civil Hospital, 1st MAP, 3rd MAP, 5th IR, 1st NDRF, 38th BSF, Mizoram Police Canine Squad, Central YMA, Sairang, Sairang Dinthar leh Sihhmui YMA leh VC-te an ni.

Lalchamliana chuan, rél kawnga lei dawh lai chim vanga chhiatna rapthlak a thleng chu pawi a tih thu sawiin, "Khuarel chhiatrupna chu thil thleng thei leh dan rual a ni lo a, mihring siam chawp chhiatna thleng ṭhinte erawh a tam zawk chu kan pumpelh theih a ni. Rel kawng siam meka vanduaina thlengah chhanchhuah hna thawktu te, ruang senghawi hna thawktute leh ruang thawn chhuah hna thawh dante thlirin, thawktute'n hna ṭha tak an thawkah ka ngai," a ti.

Chief secretary Dr Renu Sharma chuan, NDRF, SDRF, QRT, medical team leh official-te ṭha taka khawtlang mipuiin an thláwp chu state dangte tana entawn tlak a nih thu a sawi a, "A bik takin vanduaina thlenna hmuna thleng hmasa YMA member-te chungah lawmthu ka sawi a, an hnathawh dan kha a ropui," tiin, chhuanawm a tih thu a sawi.

LALCHAMLIANA THUSAWI DANG

* DMR-in a mamawh hmanruate a theih anga tihchangtlun zel a ni dawn.

* Chhiatrupna thlen palha ṭangkai tur drone lian chi lei tum a ni.

* Leimin vanga harsatna tam zawk hi pumpelh theih a ni.

* Mizoram leilung hi a nghet lo a, chu-a-chhapah lirnghing tamna seismic zone 5-a awm kan ni.

* In sak leh lei laih chungchangah thuneitute khap ngai loin fimkhur tlân a ngai.

* Tuitla an tam ta lutuk hi a zia lo hle, mipui inzirtirna atan lian tham deuhin programme huaihawt tum a ni.