MLA-in in hmun mi 30 a leisak

Serlui bialtu MLA Lalrinsanga Ralte chuan a bial chhung Saipum khuaa mi harsa, in hmun nei lo chhungkaw 30-te chu a hlawh aṭangin in hmun tur a leisak.

August 31, Ningani khan Lalrinsanga Ralte hi Saipum khuaah a kal a, in hmun tur a leisakte hnenah an in hmun tur a hlan. Hemi ní vek hian Saipum Village Council House a hawng bawk.

In hmun inhlan puala inkhawm buatsaihah Lalrinsanga Ralte chuan, "In hmun nei lote'n in hmun thar an nei thei tur hi ka lawm tak zet. Thlan chhuah zinga la tel ve lo, in hmun la nei lote pawh an mamawh dan ang zela ngaihtuah a ni ang. Mi harsa leh rethei zawkte chhawmdawl a, khaichhuah hi ka tum ber a ni," a ti.

Inkhawma tarlan danin, in hmun nei lote tana in hmun an pek turah hian a dawngtu tur dik takte'n an dawn theih nan Saipum VC President kaihhruaina hnuaiah committee din a ni a, committee-ah hian Saipuma tlawmngai pawl leh political party aiawhte an tel vek a ni.