Sarâng thenfai hnatlang huaihawt

UDPA department leh Mizoram Taxi Association chuan nimin zing khan Bethlehem Vengthlang Taxi Stand-ah hman khat daih sarâng thenfai hnatlang leh sarang ṭhat loh dan zirtirna an buatsaih a, deputy chief minister Tawnluia'n a hawng.

Deputy Chief Minister chuan, UDPA hmalaknain notified town 28-ah faina leh thianghlimna lama hmalakna kalpui a nih thu a sawi a, "Hman khat daih sarâng leh ṭawih thei mai lote tihrêm tumin sorkarin hma a la a, sarâng hman zawh hnu thehthang mai mai hian leilung tan harsatna a siam a, hriselna thlengin nghawng a nei. Hei vang hian kan do tlân a ngai a ni," a ti.

Tuirial leh Kolasib-ah hnàwm sakhat sawngbawlna kalpui a nih thu sawiin Tawnluia chuan, "Aizawl khawpui chhehvel hmun pathumah siam belh tuma hmalak mek a ni a, district khawpuiahte pawh hmalak mek a ni," a ti a; taxi driver-te chu faina chungchangah leh hman khat daih sarâng hmang lo tura mi dangte zirtirtu leh kawhhmuhtu nih tum turin a chah.

UDPA department leh MTA chuan Aizawla taxi stand 78 bakah, Lunglei, Kolasib, Serchhip, Mamit, Lawngtlai, Khawzawl, Kawnpui, Lengpui leh Thenzawlahte hman khat daih sarâng thenfai hnatlang buatsaih an tum a; lirthei aṭanga bawlhhlawh paih chhuak lo tura inzirtirna sticker bel hnatlang, inzirtirna banner tàr hnatlang leh taxi stand thenfai hnatlangte buatsaih a ni bawk.