Lungleiah ruihhlo chungchang inzirtir

Lunglei College NSS unit leh Foundation for Drug Free, Mizoram chuan nimin khan Lunglei College auditorium-ah Drug Awareness Campaign an nei a, thupui chu 'Ruihhlo tel lo nun duhawm zawk' tih a ni.

Campaign hi Lunglei College vice principal C Zairemthanga'n a kaihruai a; khuallian Donny Lalruatsanga, Lunglei additional DC chuan, "Ruihhloin a tihbuai tawh aṭanga dam leh nge kan nih, ruihhlo lak aṭanga dam tih kan inngaihtuah a ṭul. Ruihhlo vanga kan ram leh ṭhalaite nun chhe mek karah hian Mizoram hian siamṭhat hna thawk turin ruihhlo laka fihlim ṭhalai a mamawh," a ti a; Mizoramin mamawhna chhángtu ṭhalai ni turin zirlaite a chah.

MJA, Lunglei district president Laltlanthanga pawhin thu sawiin, ruihhlo chu haw hàwa do rêm chi a ni lo tih a sawi a, "Rilru fím tak leh thiamna hmanga do a ngai a, chuvangin, ṭhalai lehkha zir mekte pawhin rilru fím tak pú a, an zir thiamna aṭangin ruihhlo laka fihlim a ṭulzia an hriat a ṭul," a ti.