KHAWTHLIR

Beihrual hmang tan

September thla a ni a, Beihrual thla a ni. Mizorama kohhran pawl hrang hrangte chuan nizan aṭang khan beihrual an hmang ṭan a, September thla chhung zawng hman a ni ang. Beihrual hi June 1918-ah hman ṭan niin, kumin hi Beihrual hman kum 106-na a ni a, kum 1925 aṭangin September thlaah hman ṭhin a ni.

Principal director

Health & Family Welfare principal director Dr PC Lalramliana chu August 31, 2023 khan superanuation pension-in a chhuak a, Health Services director ṭhin Dr Vanlalsawma chu nimin aṭangin HFW principal director a ni. Dr Lalmalsawmi Sailo chu Hospital & Medical Education director a ni a, Dr Lalremmawii chu Health Services director a ni.

Award siam rêl

Mizoram Science Society chuan August 31, Ningani khan MPCB conference hall-ah Annual General Meeting an nei a; science hmasawnna tura thawh hlâwkte chawimawina atan award siam an rêl. Mizorama hna zawnna competitive exam hrang hranga subject thlan theih zingah Environmental Science leh science subject dang la tel lote telh a nih theih nan hmalak an rêl bawk. Meeting hi an president C Lalduhawma'n a kaihruai a ni.

Red Ribbon Quiz

Mizoram State AIDS Control Society leh Saitual District AIDS Prevention Committee chuan nimin khan Keifang Venghlun YMA Zawlbukah Red Ribbon School Quiz Competition an buatsaih. Intihsiakah hian middle school leh high school 12 an tel a, Oxford English School, Saitual pakhatna an ni.

Minister-in tlawh

Minister Lalrinawma chuan nimin khan a bial Tuikum constituency chhunga Hmunṭha khua a tlawh a; VC, YMA, MUP, MHIP leh Games & Sports Association hruaitute leh sikul aiawhte nen an inkâwm. Minister chuan, a bial a enkawlnaah eizawnna, zirna leh hriselnate chu a ngaih pawimawh zual pathum a nih thu a sawi.