Mizoram aṭangin Churachandpur-ah FCI-in buhfai qtl 30,000 a thawn tawh

Food Corporation of India (FCI) hotute chuan, Manipur tualchhung buaina vangin Mizoram aṭangin Churachandpur (Lamka)-ah buhfai quintal 30,000 an thawn tawh tih an sawi a; Bairabi-ah YMA-in Pathianni-ah rél aṭanga buhfai hlàn thlâk (unload) an phal loh avangin harsatna an tawh thu an sawi bawk.

FCI area manager Zodinpuii Ralte chuan September 2, Inrinni khan an pisaah thuthar thehdarhtute a kâwm a; zawhna chhángin, Churachandpur-ah ni tin mamawh an lakna kawngpui dan a nih avangin sorkar laipui lamin ti tura an tih angin June 17, 2023 aṭang khan Mizoram aṭangin buhfai an thawn thu a sawi a, "Churachandpur, Manipur-ah qtl. 30,000 kan thawn chho tawh a, naktukah pawh kan thawn leh ang. Vawi khatah truck 15-20 vel an kal tlangpui," a ti.

Zodinpuii Ralte chuan, Bairabi North YMA-in Pathianni-ah rel aṭanga buhfai hlan thlak an phal loh avangin harsatna an tawh thu sawiin, "Keini chuan Sunday-ah hian buhfai rawn phur thleng lo se pawi kan ti miah lo a, mahse, Bairabi-a buhfai rawn thlentir hi kan thuhnuaia awm a ni lo a, Railways hnuaia awm a ni," a ti a; Pathianni-ah buhfai phur thleng lo turin Railways-ah lehkha an thawn fo tawh a, mahse, an la rawn ti thleng leh ṭhin tih a sawi.

FCI Area Manager sawi danin, rélin Bairabi-a buhfai a phur thlenin a thlen aṭanga darkar 5 chhunga hlàn thlâk zawh a ngai a, darkar 5 chhunga an hlàn thlâk loh chuan pawisa an chawi ṭhin. Pathianni bikah Bairabi YMA-in rel aṭanga buhfai hlàn thlâk an phal loh avangin a hunah hlàn thlâk theih a ni lo a, chumi vanga pawisa an chàwi tam ber ṭumin cheng nuai 13 an chawi a ni.

Zawhna chhangin FCI hotute chuan, Bairabi YMA-in Pathiannia buhfai hlàn thlâk an phal loh chhan chu Pathiannia hnathawh an duh loh vang a nih thu an sawi a, "Kan buai phah hle ṭhin. Buhfai hláng thlatute hi hnam dang vek an ni," an ti.

Zodinpuii Ralte chuan, Mizoram state sorkarin FCI aṭanga buhfai quota a neih bak buhfai la awmte leh wheat-te chu Open Market Sales Scheme (OMSS) hmangin an hralh chhuak ṭhin tih a sawi a, "Stock neih tam dan azirin kan hralh chhuak ṭhin a, Bualpui, Kolasib leh Bualpui kudam aṭangin OMSS atan kan pe ṭhin," a ti a; OMSS-a buhfai an hralhna man (rate) chu tun hnaiah kg. khatah Rs 31 aṭangin Rs 29-ah tihhniam a nih thu a sawi.

FCI-in Mizoramah buhfai an nei tlem ngai lo tih sawiin Zodinpuii chuan, "Tunah chuan buhfai kan nei ṭha a, thla thum tal daih chu a awm hrim hrim. Bairabi kudamah phei chuan a leng lo hial zawk," a ti. OMSS-a buhfai an hralhna man aia hmun dang ṭhenkhata buhfai man a tlàwm zawk theih chhan zawhna chhángin, "Buhfai a chhiat zawk vang a ni a, FCI buhfai aiin a chhe zawk zel ang," a ti.

FCI Area Manager chuan, buhfai chu chawlhkar khatah metric ton 1,000 (qtl. 10,000) an hralh chhuak ṭhin tih sawiin, "OMSS-a hralhna turin Zirtawpni apiangin tender kan chhuah a, Nilaini apiangin kan lilàm (auction) ṭhin," a ti a; Mizoram sorkarin a quota pangngai baka OMSS hmanga buhfai a lei ṭhinah lei a duh ang zat zat an pe kher lo a, stock an neih dan azira an pek thu sawiin, state sorkarin kumin October thla atan qtl. 30,000 a dil thu leh thla hmasaah qtl. 20,000 a lei thu a sawi.

Zodinpuii Ralte chuan, wheat pawh OMCC hmangin an hralh chhuah reng thu leh Bairabi leh Kolasib kudam aṭangin an hralh chhuah ṭhin thu a sawi a, "Wheat hi flour mills hoin an la thin a, kar tin qtl. 1,000 hralh tur a awm. Kar tin Nilaini apiangin auction kan ti a, Food Safety and Standards Authority of India (FSSAI)-a in register ho hnenah pek theih a ni," a ti.