SEDP leh PAHOSS a hlawhchham - CLP Leader

Congress Legislature Party (CLP) leader Zodintluanga Ralte chuan, MNF sorkar flagship programme Socio Economic Development Programme (SEDP) leh Chief Minister-in a duan chhuah Parking House Support Scheme (PAHOSS)-te chu a hlawh chham chiang hle niin a sawi a, NLUP a fak thung.

CLP Leader hian nimin khan thuchhuah siamin, kum 2018 inthlan dawna MNF-in Rs 3,00,000 sem an tumna project SEDP chu chiang takin a hlawhchham niin a tarlang a, "Tuna CM ni ta hian inthlan dawnah cheng nuai 3 aia tlem lo an sem tur thu uar takin a tlangaupui a, mipui pawhin awihsakin sorkarna an chan phah nachhan pawimawh tak pakhat a ni," a ti.

MNF-in sorkarna an chan hnuah inthlan dawna an tlangaupui loh ang hlirin SEDP an kalpui tih sawiin Zodintluanga chuan, "Mipui chan ve chin a tlem hle. Inthlan leh dawn ṭêpah mi 60,000 hnenah cheng nuai 3 ni loin, Rs 50,000 an sem ve ṭâwk a ni," a ti a; Congress sorkar erawh chuan an intiam ang ngeiin NLUP hnuaiah chhungkaw nuai chuang hnenah Rs 1,00,000 an pek thu a sawi.

CLP Leader chuan, chhungkaw 60,000 dang hnenah sorkarin SEDP ṭanpuina pek leh a tum thu sawiin, "1st phase leh 2nd phase-a sem tur an ti a, chu pawh cheng nuai 3 a la ni chuang lo a, Rs 50,000 tho a ni. Hei hi an sem thei kher ang em hriat a ni lo a, an sem thei a ni pawhin 1st phase (Rs 25,000) bak an sem hman dawn lo tih a chiang, an tum dan pawh a nih a rinawm. A chhan chu inthlan puan a hla tawh lo," a ti.

Mi ṭhenkhatin SEDP vangin MNF an la chhuahsan lo nia sawiin Zodintluanga chuan, "SEDP hi an sem leh hun hunah MNF chhuahsan rûnpui a thleng dawn. Chhungkaw tam takin Rs 25,000 dawn ngei an duh a, MNF an nih loh chuan dawn theih a nih loh avangin a hmingin an MNF ve mai mai a ni," a ti a; Rs 3,00,000 pek tiama Rs 25,000 leh Rs 50,000 chauh petu MNF chu SEDP dawngtute pawhin vote an tum tawh lo niin a sawi.

CLP Leader tarlan danin, NLUP vangin mi tam takin eizawnna ngêlnghet an neih phah a, chhungkaw tam takin an dinchhuahpui. SEDP erawh dinchhuahpui tam leh eizawnna bul ṭanna tham a nih loh avangin hlawhtlinpui an awm lo a ni. A dawngtute demna tur a awm lo.

Zodintluanga Ralte chuan PAHOSS chungchang sawiin, "Mi tam takin PAHOSS dawng tura thlan an nih avangin an in leh lote an tidanglam a, an dawn mumal leh theih si loh avangin an buai phah hle. Ṭhenkhat chuan PAHOSS dawng tura thlan an nih avangin sum pûk chawptein an in leh lo an tidanglam a, an dawng mumal leh thei si loa leiba neiin an awm phah. PAHOSS hi a hlawhchham chiang hle," a ti.

CLP Leader tarlan danin, PAHOSS dawng tura thlan zingah mi 11 chiahin sum an dawn tur ang an dawng kim a, dawng tura thlan zinga a zatve aia tam chu sum la dawng miah lo an ni.

PAHOSS nodal department UDPA chuan PAHOSS dilna 1,456 an dawng tawh a, ṭanpuina dawng turin mi 403 thlan a ni tawh. Mi 140 hnenah first instalment cheng nuai 890 pek a ni a, mi 47 hnenah second instalment cheng nuai 200.60 pek tawh niin, mi 11 hnenah final instalment nuai 34.20 pek tawh a ni. Ṭanpuina dawng tura thlan zingah sum la dawng lo hrim hrim mi 205 an awm bawk.