MNF-te'n ralthuam kan dahṭhat hun chhung hi kumkhua atan a ni lo - MNYF VP

Mizo National Youth Front (MNYF) vice president Zodinpuia chuan, MNF party chuan Mizorama sorkarna chan ringawt aiin, Mizoram himna an dah pawimawh hmasak ber thu leh MNF sipaite'n ralthuam an dahṭhat hun chhung tur chu kumkhua atan a nih loh thu a sawi.

Zodinpuia hian September 2, Inrinni khan Aizawl Press Club-ah thuthar thehdarhtute a kâwm a; Mizoram leh hnam himna tihderthâwna a awm chángin MNF chu sorkar laipui hlau loa hnial ngam leh do ngam awm chhun nia sawiin, "Kan ram leh hnam, kan sakhua himna hi MNF ngaih pawimawh ber a nih avangin, hemi tichhe thei thil reng reng chu huaisen takin a do mai ṭhin. Mizorama sorkarna chan ringawt aiin, Mizoram himna hi MNF chuan a dah pawimawh hmasak ber a ni," a ti.

MNYF Vice President chuan, "MNF-te'n ralthuam kan dahṭhat hun chhung tur hi kumkhua atan a ni lo a, India rama kan hnam a him chhung atan leh, an thutiama India a rinawm chhung atan chauh a ni," a ti a; MNF sipaite'n silai an tun chhan chu Mizoram mipui leh kohhrante ngenna vang a nih thu leh remna thuthlung angin Indian Constitution Article 371(G) hmangin Mizoram humhim a nih thu a sawi.

Zodinpuia chuan, MNF-in March 1, 1966-a independence a sual hmain Mizo khawtlang nun chu hnam dang ngaihsanna bâwihah a tlu lut nasa hle niin a sawi a, "Mizo nula leh tlangvalte'n vai hla thiam leh vai thuam inbelte chu changkànnaah an ngai hman hial a, sumdawnna lamah chîmralna kawng kan zawh thui hman viau," tiin, chu'ngte chu MNF-in an ṭhiat a, tun thlenga Mizo hnam leh Kristianna humhima a awmna chhan chu MNF vang niin a sawi.

MNYF Vice President chuan, kum 2018 inthlanpuia MNF manifesto-a Mizo ṭhalaite puala manifesto point 11 siamte chu MNF sorkarin a tihlawhtling vek tawh niin a sawi a; MNYF Headquarters-in hmalakna an neih chho turte sawiin, September 2023 aṭangin Mizoram pumah Mizo Nationalism Campaign neih an tum tih a tarlang.

MNYF President chuan, Martar Ni - September 20 pualin September 19-ah Aizawlah two wheeler hmangin Mizo Nationalism Rally huaihawt an tum thu te, 'Mizoram leh hnam tan MNF hlutna' tih thupuia hmangin Reels Making Video Contest buatsaih an tum thu leh college zirlaite tan Essay Writing Competition buatsaih an tum thu te, September 28-ah Vanapa Hall-ah Mizo ṭhalaite intawhkhawm huaihawt an tum thute a sawi a ni.

MNYF VICE PRESIDENT SAWI DANGTE

▶ MNF hi Mizo hnam a boral lohna tura Mizo nationalism zirtirtu a ni. Tun thlenga ram leh hnam hmangaihna ṭhangtharte'n kan la neih chhan hi MNF chi tuh rah a ni.

▶ Hnam dang awpbehna lak aṭanga Zoram zalenna sual ngam awm chhun chu MNF a ni.

▶ MNF hi Mizo mipui hnena politics dik min zirtirtu a ni.

▶ Politics dikah chuan kan hnam nunphung (culture) leh sakhua a him tur a ni... India ram rorelna sang ber pawhin a khawih chêt theih loha Mizo hnam nun leh sakhua humhimtu chu MNF a ni.

▶ Ram leh hnam hmasawnna tura pawi­mawh infrastructure development din kawngah MNF aia thawk ṭha an awm lo a, Mizorama hmasawnna lian zawng zawng hi MNF kutchhuak deuh vek a ni.

▶ Mizoram ramri humhalhna kawngah MNF aia huaisen an awm lo. Assam state nen ramri buai kan neihah MNF chuan silai a hmet puak ngam.

▶ Khawvel hmun hrang hranga Zo fate kuah khawmtu chu MNF a ni.

▶ MNF hi Mizorama political party zawng zawngah hruaitu nei ṭha ber a ni. Tuna political party dang hruaitu leh an CM candidate zawng zawng hi MNF-a awm tawh vek an ni a, MNF hruaitute chu party dangah an la zuang láwr ve ngai lo.