Mi taima leh ti tak tak peihte sorkarin a ngaihthah dawn lo - Duhoma

ZPM leader Lalduhoma chuan, ZPM-in sorkarna an chan chuan mi taima leh ti tak tak peihte sorkarin a ngaihthah dawn loh thu a sawi.

Lalduhoma hian September 2, Inrinni khan Lunglei North huam chhunga Pangzawl leh Thiltlang khuaa an party zawm tharte lawm luhnaah thu a sawi a; ZPM chu a duhtui dawn tih sawiin, "Mi taima leh ti tak tak peihte chu sorkarin a ngaihthah dawn lo. Sorkar kal tate khan thlai chi hrang hrang min chìntir ve bawk ṭhin mah se la, kan dinchhuahpui ngai lo. ZPM sorkarah chuan a rate hre sa vek chunga thlai inchìntir a ni ang," a ti.

ZPM Leader chuan, tuna Mizoram thupui leh titipui ber chu ZPM a ni ta deuh ber niin a sawi a, "ZPM chu thawhrim rah seng tur kan nih avangin kan thatchhe ve tur a ni lo a, party dangte aiin kan taima tur a ni," a ti a; an party zawm tharte chu sorkar thar ṭha tak siampuiah a sáwm.

Lunglei North biala candidate tura ZPM-in an ruat V Malsawmtluanga pawhin thu sawiin, MLA inthlanpui hnuhnung bera bial mipui tana a intiamna chu tunah pawh a la danglam lo tih a sawi a; thlan tlin a nih chuan bial mipui ṭanpui tur leh kawng kawhhmuha chhawmdâwl turin kawng hrang hranga hmalak a tum thu a sawi a ni.

Lalduhoma hian Thiltlang aṭangin voter 31 leh Pangzawl aṭangin voter 153 a lawm lut niin ZPM thuchhuah chuan a tarlang.