Mahnia dingchhuak thei lote dinhmun duhawm zawka kan dah ka beisei - Lalsawta

Congress party president Lalsawta chuan, ṭang puihna hmangin nasa taka hna thawktu, mahnia dingchhuak thei lote dinhmun duhawm zawka an dah ngei a beisei thu a sawi.

Congress party aṭanga AMC councillor Zodingpuii'n Mizoram Gorkha Youth Association, Lawipu hnena plastic chair eng emaw zat a pe a, Maubawk Vengthar Welfare hnenah Maubawk Vengthar leh MINECO inkara lei (bridge) siamna tur Rs 1,00,000 a pe a; bungrua leh pawisa inpekna hun hi Lalsawta'n hmanpuiin thu a sawi a ni.

Lalsawta chuan, "Kut hnathawktu, nasa taka hna thawktu, anmahnia dingchhuak thei lote hi ṭang puihna hmangin dinhmun duhawm leh ṭha zawkah kan dah theih ngei ka beisei. Mirethei leh khawsak harsa tan Congress party hi nghet takin a ding zel dawn a ni," a ti.

MPCC President chuan, kut hnathawktute mamawh a inang vek lo tih sawiin, "Puanṭhui khawl mamawh an awm laiin thing zai khawl mamawh an awm ang. Huan thlai siamte tana awlsam zawka an huan lei lehna leh huan sâmna thlengin, kut hnathawktute tana malsawmna nasa zawk thlentir turin ṭang puihna hi hman ṭangkai kan tum," a ti bawk.

Lalsawta hian councillor Zodingpuii hmalaknate a enpui a, Maubawk Vengthar leh MINECO inkara lei siamna tur pawh a hmunah a en bakah, ward fund hmanga kawng laihte a en a ni.