Kalphung tharah chuan mipui sorkar dik tak a awm dawn - ZPM President

ZPM president Lalliansawta chuan, 'Kalphung thar - Mipui sorkar' tih chu amah leh amah a insawifiah nghal a, kalphung tharah chuan mipui sorkar dik tak a awm dawn thu a sawi.

Lalliansawta hian September 1, 2023 khan Aizawl West-III bialtu MLA VL Zaithanzama'n MLA fund hmanga a biala hna a thawhte dah khawmna documentary thawh khatna a tlangzarh a ni.

Tlangzarhnaah hian Lalliansawta chuan, an sawifiah fo hnuah pawh mite'n 'Kalphung thar - Mipui sorkar' chu eng nge a nih an zawt leh ṭhin tih sawiin, "Kalphung thar - Mipui sorkar tih hi amah leh amah a insawifiah nghal. Kalphung tharah chuan mipui sorkar dik tak a awm dawn a, hmalakna tur kan duan tam tak piah lamah he danglamna mipui sorkar tih ringawt pawh hi kalphung thar a ni tawh hrim hrim a ni," a ti.

ZPM President chuan, "Vantlang hmaa phochhuah ngam mai ni lo, hmasawnna min thlentu MLA fund hna­thawh ṭha tak kan hmu zel hi a ropui. ZPM MLA mai ni lo, AMC corporator thlenga an hnathawhte a hmun ngeiah kalin ka en ve tawh hlawm a, dik taka thawh a nih chuan fund tlemtê hmang pawhin hna ropui tak a thawh theih tih a chiang hle," a ti a; VL Zaithanzama'n a MLA fund hmanga hna a thawhte chu lawmawm a tih thu a sawi.