Gauhati High Court in thar hawn a ni

Gauhati High Court, Aizawl Bench building thar, MINECO-a mi chu September 2, Inrinni chhun khan Chief Justice of India Justice Dhananjaya Y Chandrachud-a'n a hawng.

Gauhati High Court, Aizawl Bench building thar hi Non Lapsable Central Pool of Resources (NLCPR) aṭanga hmuh cheng nuai 4,624.12 senga sak a ni a, contractor chu North East Consultancy Services (NECS) niin, March 7, 2017-ah sak ṭan a ni. In pui ber (main building) chu chhawng li a ni a, a chhuat pali zau zawng belhkhawm square metre 11,612.98 a ni. Advocate building leh visiting judge bangla-te a awm bawk.

Justice Dhananjaya Y Chandrachud chuan, ram inrêlbàwlnaah court-in mawhphurhna pawimawh tak a nei tih sawiin, "Hei vang hian court-in hmunhma ṭha, thawktute'n felfai taka hna an thawh theihna neih a pawimawh. Hmunhma ṭha aia pawimawh zawk erawh a la awm a, chu chu democracy innghahna lungphûm pawimawh dan hmanga rorelna dinpui a ni," a ti.

Gauhati High Court, Aizawl Bench in thar chuan Mizoram chu dan hmanga enkawl a nihzia a tifiah nia sawiin Chief Justice chuan, "Gauhati HC hian danglam bikna tak a neih pakhat chu, state pali huamah hna a thawk hi a ni a, a mawhphurhna hi a pawimawh em em. Aizawl Bench in thar pawh hian nasa takin hma a sawn zelna turah a thawh hlâwk hle dawn a ni," a ti a; dan hmanga rorelna chu India ram chelh nghehna pawimawh a nih thu a sawi.

Chief minister Zoramthanga pawhin thu sawiin, tun hmaa underground kaihruai ṭhintuin tuna HC ropui tak hawnnaa thu a sawi thei chuan India ropuina leh a chhungah hnam chi tinte an lenzia a tifiah niin a sawi a, "Mizoram hi India-in Separation of Juduciary a kalpui khan hmarchhak state-a a taka kalpui hmasatu leh Lokayukta a lo chhuah leh pawhin hmarchhaka kalpui hmasatu a ni," a ti.

Tun hnaia Mizoram chhehvela harsatna thleng vangin Mizoramah ráltlân an luh nasat thu sawiin Zoramthanga chuan, "Mizoram chu remna leh muanna tluantling awmna ram a nih avangin a chhehvela buaina leh harsat tâwk kan unaute'n he remna leh muanna boruak hi pu darh a, an hnena thlentirtu ni turin
min beisei mek a ni," a ti bawk.

Gauhati HC, Mizoram Bench in thar hawnnaah hian sorkar laipuia Law & Justice minister of state Arjun Ram Meghwal, Gauhati High Court chief justice Justice Sandeep Mehta leh Gauhati High Court judge Justice Michael Zothankhuma te pawhin thu an sawi a ni.