Gauhati High Court in thar hawn a ni

Commerce & Industries minister Dr R Lalthangliana chuan September 2, Inrinni khan Lungleiah Geology & Mining pisa thar a hawng. September 1, 2023 khan a bial chhung Hnahthialah Bawrhsap pisa leh District Urban Development Officer pisa thar a hawng bawk.

Geology & Mining pisa hawnnaah Dr R Lalthangliana chuan, sorkarin Geology & Mining department a ngai pawimawh tih a sawi a, "Lunglei bik atan thawktu post 10 a siam nghal a, a kal zelna turah pawh sorkar chu a tlanchhe dawn lo a, geologist pawh dah thuai tum a ni," a ti.

Geology & Mining department chu department lian ni lo mah se, kum hnih khat chhungin cheng nuai 1,200 chuang an thawk chhuak thei tih sawiin R Lalthangliana chuan, "Thawh chhuah awm loa a ei ral zawng ringawta ram a kal ṭhin chu bànsanin, lak luh tam zawk a awm theih nan office hi duan a ni," a ti a; Geology & Mining mamawhte chu sorkarin í-hé lo pek zel a tum thu a sawi.

Geology & Mining director Lalthazuala chuan, Lungleia Geology & Mining pisaah thawktu 13 awm tura ruahman a nih thu a sawi a; Lunglei East bialtu MLA Lawmawma Tochhawng, Lunglei North bialtu MLA Dr Vanlalṭanpuia, Lunglei South bialtu MLA Dr K Pachhunga leh Lunglei bawrhsap Ramdinliani ten thu an sawi bawk.

Hnahthial DC pisa hi Special Assistance to State for Capital Expenditure aṭanga sum hmuh hmanga sak a ni a, work order amount chu Rs 9,08,93,558 a nih laiin, cheng vbc 10 vel hman a ni.

DUDO pisa chu SEDP sum nuai 70 sênga sak a ni a, contractor chu Vanlalhuma a ni.