HFW Minister-in Oxygen Plant a hawng

Health & Family Welfare minister Dr R Lalthangliana chuan September 2, Inrinni khan Lunglei Pûkpuiah Oxygen Plant (filling station) a hawng a, health system a ṭhat loh chuan ram a ṭhang thei lo tih a sawi.

Oxygen Plant hawnna inkhawm Civil Hospital, Lunglei Doctors Seminar Hall-a neihah HFW Minister chuan, oxygen plant chu Lunglei leh chhim lam district tan a ṭangkai hle dawn thu a sawi a, "Pawl bik awm loin a mamawhte tana siam a ni. Kan health system hi a ṭhat loh chuan kan ram hi a ṭhang thei dawn lo a, Covid hri léngin oxygen plant hi a hring chhuak a ni," a ti.

Health Minister chuan hriselna a pawimawh thu sawiin, "Khawvelah damna leh hriselna a pawimawh ber a, doctor leh nurse-te ṭawngkam hnih khat lek pawhin damlo a tidam thei. Lunglei Civil Hospital pawh tihchangtlun mek a ni a, ICU mai bakah, naupang ICU-te siam a ni," a ti a; dDamlote tana thil hrang hrang endikna trauma centre hman theih a nih tawh thu a sawi.

Hawnna inkhawmah hian Lunglei North bialtu MLA Dr Vanlalṭanpuia leh Lunglei South bialtu MLA Dr K Pachhunga te pawhin thu an sawi a ni.

Pukpuia Oxygen Plant thar hi North East Special Infrastructure Development Scheme (NESIDS) aṭanga hmuh cheng nuai 270. 27 hmangin siam a ni a, a buntu chu VIDUREPL Agency, Guwahati an ni. Khawl hian ni khatah (darkar 24 chhungin) jumbo oxygen bûr sei chi 96 a thun khat thei tih sorkar thuchhuahin a tarlang.