KHAWTHLIR
MPF seminar
September ni 2, 2023 Inrinni khan MPF, Aizawl East-I Constituency Forum chuan an biala Constituency Forum hruaitute pualin Falkland Presbyterian Kohhran Hall-ah seminar an buatsaih a, MPF general secretary Rev. Lalramliana Pachuau-in a hmanpui.
West-III bialah MPCC President
Congress party president Lalsawta chu kumina MLA inthlanpuiah Aizawl West-III biala ding tura tihchian a ni tawh. Vanglaini thu dawn danin, Lalsawta hi Aizawl West-III ah chiah a ding dawn a; chutih laiin, bial danga an candidate tur pawh an tifel kim ṭêp a, bial thum tih loh chu an tifel tawh a ni.
Hindi tawng zirtir
Assam Rifles chuan September 1, 2023 khan an awmna hmun hrang hrangah Hindi zirna, Hindi Language Learning Class an buatsaih a, naupang leh ṭhalaite Hindi ṭawng an zirtir.
Kuhva leh heroin
Assam Rifles sipaite chuan September 2, Inrinni khan New Champhaiah dan loa Myanmar aṭanga lak luh kuhva rah ip 160 an man a, Customs department hnenah an hlân. Kuhva rah an man hi Rs 89,60,000 hu a ni. AR sipaite hian September 1, 2023 pawh khan Chhungte, Champhai huam chhungah Lalrinmuana (32) hnen aṭangin heroin gram 60.2 an man bawk a, Rs 42,14,000 hû a ni. Heroin leh a kawltu hi Excise & Narcotics department hnenah an hlan.
Kristian Hla Bu chungchang sawiho
Mizoram Presbyterian Kohhran leh Baptist Church of Mizoram aiawhte chuan September 1, 2023 khan Synod Office-ah Kristian Hla Bu ennawn chungchangah an sawiho. Inrawnkhawmna hi Synod moderator Rev. Dr C Chawnghmingliana'n a kaihruai a; Kristian Hla Bua hla awm mek 600 zinga belh àwmte leh thun thar atana ṭha tur te, thu chhiar inchhâwn, ṭawngṭaina, solfa ziah dante enho a ni. Kristian Hla Bu hman lai hi kum 2004-a tihchhuah a ni.