Mizoram electoral roll aṭanga Tripura-a Bru-te paihna tur ruahmannaah lawm

Mizo Students' Union (MSU) chuan thuchhuah siamin, October 1997 aṭanga an duh thu ngeia Mizoram chhuahsana Tripura-a pêm Bru-te Mizoram sorkar leh sorkar laipui hmalakna anga Tripura state-a an awm nghehna tur leh Mizoram electoral roll aṭanga paih an nih theihna tura ruahmanna kalpui a ni chu lawmawm an tih thu an tarlang.

MSU chuan, Bru-te Tripura-a an awm nghehna tura inremna (agreement) ziah ní, January 16, 2020 chu Mizoram tan ni lawmawm leh chhin­chhiah tlak a nih thu an sawi. Mizoram chhuahsana Tripura-a awm Bru-te avang­in Mizoram sorkar bakah, tlawmngai pawlte leh Mizo mipuite'n harsatna tam tak an tawh phah tawh nia sawiin MSU chuan, "Kum 2014-ah phei chuan NGO Coordination Committee hmalaknain Lok Sabha inthlan Mizoram pumpuiah boycott hial a ni," an ti.

MSU chuan, Tripura state chhung camp paruka la khawsa mek Bru-te Mizoram khua leh tui an nihna paih a ni tur leh Mizoram electoral roll aṭanga paih an ni tur chu lawmawm an tih tak zet thu sawiin, "Mizoram sorkar hmalakna hi chhuanawm kan ti tak zet a ni," an ti a; Mizoram Council of Minister meeting, November 8, 2019-a neihin, 'November 30, 2019 thlenga Mizorama rawn lêt lo Bru-te Mizoramah hruai kir an ni tawh lo ang' tih thu a pass chu lawmawm an tih thu an sawi.

Tuna Mizoram khawthlang lam leh hmun hrang hrangah Bru chhungkaw tam tak chengte chu Mizote lakah buaina leh harsatna siam lo tura chahin MSU chuan, "Mizoram chhungah thlamuang taka an chen theih nan inlâk hran tum lo a, Mizo nun dan phung zawma khawsa turin kan chah a ni," an ti.