CM hêk chungchangah Lokayukta-in dan hre mite ngaihdan a dawng tawh

5th September, 2023

Lengpui Airport tihchangtlunnaah dan bawhchhiatna a awm nia ngaia chief minister Zoramthanga hêkna chungchangah Mizoram Lokayukta chuan dan hre mite ngaihdan a dawng tawh.

Lokayukta aṭanga thu dawn danin, Chief Minister hêk a nihna chhuitu Anti Corruption Bureau (ACB) chuan CM Zoramthanga thiam lohna an hmu lo. Lokayukta chuan ACB report chu an zir chian hnuah dan lam thiamte ngaihdan (legal opinion) a dil a ni.

Hun eng emaw chen legal opinion nghah a nih hnuah tun hnai khan Lokayukta chuan an dawng. Legal opinion aṭang pawhin CM hêk a nihna chu tihzui vak ngaihna a awm lo a ni. Hetih lai hian, Lokayukta chuan CM hêkna chungchangah hian thutlukna a la siam lo.

Vanglaini zawhna chhangin Lokayukta chairman Lalsawta chuan, "Investigation Wing kan nei lo a, chuvangin chhui tura kan ruat ACB chhuina hi kan pawm mai a ngaihna chin a awm. Chutih rualin, he thubuaiah hian thutlukna kan la siam lo a, kan la zir chiang leh mek. Investigation Wing chu nei ila thil nihphung a danglam deuh mai thei," a ti.

Tarlan tawh angin, Mizoram First Movement (MFM) chuan Lengpui Airport tihchangtlunnaah dan bawhchhiatna a awma ngaiin, a mawhphurtua an ngaih CM Zoramthanga chhui turin April 11, 2022 khan Lokayukta-ah ngenna an thlen. Lokayukta chuan bawhzuiin, chhui turin July 2022 khan ACB a hriattir a, ACB-in an chhui a ni.

Lokayukta hotute hnen aṭanga Vanglaini thu dawn danin, ACB hnena chhui chiang tura an hriattir hmain Lengpui Airport tihchangtlun chungchangah hian GAD leh PWD-ah thil ṭhenkhat an zawt hmasa a, document pawimawhte an dil bawk.

GAD leh PWD aṭanga document an dawnte chu Lokayukta chuan an enfiah a, MFM-in CM Zoramthanga an puhna chu chhui zui tlakah ngaiin, chhui turin ACB an hriattir a ni.

MFM chuan, PWD enkawltu CM Zoramthanga chu a thuneihna hmang sual leh chhungkhat lainá duhsak uchuakah an puh a, "India Danpui Article 14 a bawhchhiat avang te, General Financial Rules 2017-a Rule 162 leh Vigilance Commission thuchhuah hrang hrangte a bawhchhiat avangin Prevention of Corruption Act, 1988 hnuaiah thubuai siamsak ngei turin Lokayukta-ah ngenna kan thlen a ni," an ti.