Thingsulthliah HSS adhoc aided-a dah phûtin khaw paliah flag dum tàr a ni

Mizorama lumpsum grant-in-aid higher secondary school pakuate chu adhoc grant-in-aid dinhmuna dah phut vangin khàr zui zel a ni a; lumpsum HSS zinga mi, Thingsulthliah HSS-a zirlai awmna khua pathumah nimin khan flag dum tàr a ni. An khaw HSS adhoc status-a ngiattu dang NE Khawdungseiah pawh in tinah flag dum an zar.

Thingsulthliah Joint Action Committee for School Upgradation leh Thingsulthliah HSS Student's Union hmalaknain nimin khan Thingsulthliah, Thingsul Tlangnuam leh Seling khuaahte adhoc grant-in-aid dinhmuna sikul dah phûtna leh sorkar thu ngaihchanna atan nimin khan flag dum tàr a ni.

Flag dum tàr hmain inkhawm tawi buatsaih a ni a, Thingsulthliah JAC vice chairman C Lalruatkima'n kaihruaiin, Thingsulthliah HSS principal leh Managing Board secretary R Lalfakawma’n thu a sawi. Kalkhawmte chu adhoc aided-a dah phûtin an au rual bawk.

Thingsulthliah HSS zirlaite leh JAC member-te'n zing dar 9:30 aṭangin flag dum siamin an hnatlang a, an siam zawhah an tár nghal a, khaw chhung in tinah tàr a ni.

Adhoc grant-in-aid dinhmuna dah ngiatin Thingsulthliah All NGO & All Political party meeting chuan joint resolution an lo siam tawh a; zirlai nu leh pate pawhin admission fee leh monthly fee an àwl theih nan adhoc-a dah phûtna thuchhuah an siam tawh. JAC hruaitute chu a theih ang anga minister hmu turin nimin khan Aizawlah an kal bawk.

Thingsulthliah HSS hi kum 2004-a din niin, kum 2008-a lumpsum-a hlân kai a ni a, zirlai 155 an awm mek.

Tarlan tawh angin, Mizoram Govt. Lumpsum Aided Higher Secondary School Association chuan an sikul, khaw pakuaa lumpsum aided higher secondary school-te chu adhoc grant-in-aid dinhmuna hlàn kai an phût avangin August 29, 2023 aṭangin tiam chin awm loin sikul an khâr a ni.