Rastriya Poshan Maah hmang ṭan

Social Welfare & Tribal Affairs minister Lalrinawma chuan nimin khan Women & Child Development directorate-ah Rastriya Poshan Maah (Natio­nal Nutrition Month) a hawng.

Poshan Maah thupui chu, 'Suposhit Bharat, Sak­shar Bharat, Sashakt Bharat' (Well-Nourish India, literate India, strong India - Chaw ṭha leh zirna ṭha nena thuam chak India) tih a ni.

Rastriya Poshan Maah hi September thla chhunga hman tur a ni a, kumin hi vawi rukna a ni. Thupui zûlzuiin hmalak dan tur pasarih - hnute tui leh chaw ṭha dang hmanga naute châwm len, naupang hriselna lama intlansiakna, ei tur ṭha leh zirna kalkawptir, nun­phung dik leh ṭha hmanga hriselna, ram leh hnam hmangaihna kawnga inzirtirna, ei tur ṭha atana tualchhung thar ngei hman leh ei chhiat vanga thisen tlakchhamna tireh tura hmalaknate kaltlangin hun hman a ni ang.

Minister Lalrinawma chuan, India ramah chaw ṭha, taksa mamawh ang hmu lo mi eng emaw zat an awm thu sawiin, "Sorkarin kum tin Sep­tember thlaah chaw ṭha ei kawnga inzirtirna leh hmalakna Poshan Maah a kalpui ṭhin a, hei hian rah ṭha a chhuah ngei ka beisei," a ti a; mipuiin ei leh bâr an tlâkchham loh nan sorkarin man tláwm zawkin Food Security Act kaltlangin ei tur a ruahman ṭhin thu a sawi.

Lalrinawma chuan, sorkar scheme-te hlawhtling zawka kalpui turin ram leh hnam hmangaih a, neitu nihna thinlung pu tura inzirtir tam a ṭul thu a sawi a, "Poshan Maah-in a tum zinga tel, ruahtui dah khâwl leh hman ṭangkai bakah, thupui dangte chu ram hmasawnna tura ṭul a ni tih hriaa a hlawhtlin theih nan ṭan kan lak a ngai," a ti.

Rastriya Poshan Maah hi Ministry of Women & Child Development hnuaia Poshan Abhiyan hmalakna a ni a, kum 2018 aṭangin kum tin September thlaah hman a ni ṭhin.

Poshan Maah kaltlangin naupang kum 6 hnuai lam ṭhanṭhu vên te, naupang kum leh rih zawng inmil lo lutuk te, sàn zawng leh rih zawng inmil lo lutukte tihbo a nih theih nan hmalak ṭhin a ni a; hmeichhe tleirawl leh nu ho zinga thisen tlâkchhamna (anaemia) tihhniam leh nau piang hlim zâng lutuk tihhniam turin mipui vantlangah zirtirna kalpui ṭhin a ni.