Kawng chhiat vangin kawng zawh

Chawngtea Mizo leh Chakma tlawmngai pawl hrang hrang huaihawtin nimin khan Chawngte khaw chhung kawngpui chhiat vanga lungawi lohna lantir nan mipuiin kawng an zawh.

Kawng zawhnaah hian mi 500 vel an tel a, Chawngte khelmual aṭanga ṭanin, SDO (Civil) pisa thleng kawng an zawh a ni. Kawngzawhah hian pawl hrang hrang aiawhte'n thu an sawi a, SDO (Civil) hnenah memorandum an thehlut nghal.

Thu sawitute chuan, kawng hrang hrangah ngaihthah an nih thu te, kawng chungchangah an chan tur leh a nih dan tur ang an nih phak loh ṭhin thu te, Mizoram sorkarin an dinhmun harsatzia hriaa a ngaihsak an phût thu te, Chakma Autonomous District Council sorkar pawhin theihtawp chhuah ve se an duh thute an sawi.

Memorandum an thehluhah hian, kawng chhiat vangin sikul leh college zirlaite'n zirna-in an pannaah harsatna an tawh thu te, chhungkaw hrang hrang eizawnna leh lirthei hmanga eizawngte pawhin harsatna an tawh thute an tarlang a; Mizoram sorkar leh CADC sorkar chu kawngpui thawm ṭha tura chak taka hma la turin an phût a ni.

All NGO hruaitute chuan, sorkara an thu thlenah September 9, 2023 (Zirtawpni) thleng pawha hmalakna an hmu lo a nih chuan a tàwp thlengin hmalak an tum thu an tarlang bawk.