KHAWTHLIR

ANC-in thisen pe

Aizawl North College NSS unit chuan nimin khan Civil Hospital, Aizawl tan thisen unit 71 an pe a, petute mipa 44 leh hmeichhia 27 an ni.

Mímkût hmang dawn

Mímkût Celebration Organizing Committee chu nimin khan an chairman Lalrinawma, Social Welfare & Tribal Affairs minister hoin Excise & Narcotics conference hall-ah an ṭhukhawm a, kumina Mímkût hman dan tur an rêl. Mímkût hi September 29, 2023 khian Vanapa Hall-ah hman tum a ni a, sum senso tur sorkar laipui aṭangin hmuh a ni.

Chawimawina hlan

Serchhip district education officer Lawmawma chuan nimin khan Serchhip BRC Hall-ah Serchhip district-a zirtirtu ṭha thlan chhuah pathum - V Suresh, Bungtlang H/S headmaster, R Lalmalsawma, Hmunṭha P/S headmaster leh Sangchhawni, Chhingchhip Central M/S headmistress-te hnenah District Award to Teacher a hlan. Award hian silver medal leh Rs 5,000 a keng a ni.

E-shram & PMSYM

Labour, Employment, Skill Development and Entrepreneurship department, Central YMA leh common service center-te chuan tun hnai khan Serchhip, Lawngtlai, Mamit, Saitual leh Khawzawl district-ah e-shram leh PMSYM registration camp an bautsaih a, mi 3,400 chuang an inziak lut. E-shram hi mahni kutkêa hna thawka eizawngte hamṭhatna atana duan a ni.

Manipur ráltlân

Sorkar chhinchhiah danin, Mizoramah Manipur aṭanga sahimna zawnga tlan lut mi 11,998 an awm mek. Nimin tlai dar 5 dinhmun angin, Manipur raltlan awm mek mi 11,998 zinga 2,534 chu relief camp 34-a awm an ni a, mi 9,464 chu hmun danga awm an ni thung. District zinga ráltlân tamna ber Aizawl district-ah mi 4,410 an awm a, Kolasib (mi 3,660) leh Saitual (mi 2,951) ten an dawt a ni.