Kut hnathawktute tan káwl a êng dawn - ZPM Treasurer

ZPM party chuan nimin khan an pisaah chhung inkhawm an nei a, ZPM treasurer C Lalṭanpuia'n thu sawiin, "Kalphung thar mipui sorkar kan din hunah chuan kut hnathawktute tan káwl a êng dawn," a ti.

C Lalṭanpuia chuan, ZPM an din chhan chu policy a nih thu sawiin, "Kut hnathawktute tana kan policy hi a ropui tak zet. Kan policy-ah chuan agriculture leh horticulture kan nawr na dawn. Awlsam si, hlâwk zawk bawk sia hmalakna kan kalpui theih nan kan mithiamte'n ruahmanna an siam vek tawh," a ti a; bâwng vulh leh bawng êk hmanga leiṭha siam an uar dawn thu a sawi.

ZPM Treasurer chuan, 'Kalphung thar, mipui sorkar' tih chu amah a insawifiah nghal nia sawiin, "Kalphung thar chu mipui sorkar din a ni mai. Sorkarna kan siam chuan mipui duh dan a lal dawn a, kut hnathawktute tan káwl a êng dawn a ni," a ti.