Lawngtlaia Dy Conservator of Forest Pisa thla khat chuang an dang tawh

Kaladan Multi Modal Transit Transport Project (KMMTTP) kawngpui sialnaa ram lak neitu intélkhawm, Lawngtlai District Land Owners Association-in zangnadawmna pek phûta Lawngtlaia Deputy Conservator of Forest, Chhimtuipui Wildlife Division pisa an dan chu an la chhunzawm zel a, thla khat chuang an dang tawh.

Tarlan tawh angin, LDLOA hian KMMTTP kawngpui siamnaa sorkarin an ram a lak avanga zangnadawmna pek an phût avangin August 1, 2023 aṭangin Lawngtlaia Deputy Conservator of Forest office-a pisa kai turte an dang ṭan a, nimin thleng khan an la dang a ni.

Hetih lai hian, September 1, 2023-a an ṭhutkhawm hnuah KMMTTP kawngpui erawh chu thenfai an remti a; VC Association bakah, YLA sub-headquarters pathum - Bungtlang South, Vaṭhuampui leh Tuithumhnar ten KMMTTP kawng an zawh hleih theih loh avanga harsatna an tawh thu an thlen leh kawng thenfai phalsak tura an ngenna chu an ngaihtuah a, lirthei lian kal theih tura thenfai an remti a ni.

September 1-a an ṭhutkhawmnaah hian LDLOA chuan, Chief Minister aṭanga an thu dawn, CMO aṭanga zangnadawmna an hmuh theih nan sorkar hmalaknate leh lungawi lohna an lantir mek chawlhsan tura ngenna an dawn chungchang an ngaituah bawk a; Chief Minister hmalakna chu lawmawm an tih rualin, Deputy Conservator of Forest pisa erawh dan zui zel an rel a ni.

KMMTTP kawngpui zawh theiha thenfai a nih chhunga mamawh zualpuite chhêk khâwl a nih hnuah zangnadawmna an la hmu lo a nih chuan na zawkin sorkar nawr chhunzawm an rél bawk.