MNF MLA 28-te hian mahni inhaivûr turin hma kan la hman lo - MLA Rintluanga

MNF party chuan nimin khan Mizo Hnam Rûnah chhung inkhawm an nei a; MNF adviser Lalrintluanga Sailo, MLA-in thu sawiin, MNF MLA 28-te'n mahni inhaivûr turin hma an lak hman loh thu a sawi.

Govt deputy chief whip Lalrintluanga Sailo chuan, MNF sorkarin harsatna hrang hrang an hmachhawn a, chief minister Zoramthanga kaihhruaina hnuaiah harsatna lian lutuk tâwk loin tun hun an thleng tih a sawi a, "MNF MLA 28-te hian mahni inhaivûr turin hma kan la hman lo, ram tan kan pên miah miah mai a zawk a ni. Min beitute'n eng thil pawh ti ila min bei zel dawn, mahse, mipui tan kan beihna kawngah kan ṭang mar zel dawn," a ti.

MNF Adviser chuan, political party ṭhenkhat chu consitution an nei lo emaw tih turin vice president-ahte an inruat tawp tawp zel nia sawiin, "An party chhungah administration a felfai lohzia a hriat hle," a ti a; ZPM party pawhin vice president an ngah tawh a, an party chhungah buaina a titam niin a sawi.