Teachers' Day football exhibition match

State Working Committee chuan Teachers’ Day pualin nimin khan Lammualah exhibition football match an buatsaih a, School Education minister Lalchhandama Ralte-in a hmanpui. Minister chuan, Mizo ram leh hnam zahpui lo a, Mizo hnam nunphungte zirlaite'n uar lehzuala an chhawm nun a pawimawh thu a sawi.

Lalchhandama Ralte chuan, Mizo hnam hla, 'Ro min relsak ang che' tih chu zah taka sa ṭhin turin zirtirtute leh zirlaite a chah a, "Kan hnam hla kan sak apiangin kan awmna hmunah ding chungin zah tak chunga sa ṭhin tur kan ni. Kan ram leh hnam zahpui lo a, kan culture-te zirlaite'n uar lehzuala kan chhawm nun a pawimawh," a ti.

School Education Minister chuan, Zirtirtute Ni chu state pum huap programme siam a ṭhat rualin, zirlaite'n an sikul ṭheuha zirtirtute chawimawina hun hman an duh ṭhin avangin State Working Committee chuan mahni remchan dan anga hman turin a ruahman thu a sawi bawk.

Teachers' Day exhibition match-ah hian sorkar sikul 22 leh mimal sikul 32 aiawh zirtirtute an inkhel a, mipa leh hmeichhia a hranin an inkhel. Exhibition match puala inkhawm chu School Education additional director Lalhmachhuana'n a kaihruai a ni.