Hriselna lama kan state hmélhmang tidanglam tur project kalpui a ni - Health Minister

Health & Family Welfare minister Dr R Lalthangliana chuan nimin khan Aizawl Press Club-ah thuthar thehdarhtute a kâwm a; hriselna lama Mizoram hmélhmang tidanglam dâwrh tur project kalpui mek a nih thu a sawi.

Dr R Lalthangliana chuan, Mizoram sorkar leh World Bank thawh dunna project, Mizoram Health System Strengthenning Project (US dollar 40 million project) kalpui mek a nih thu a sawi a, "He project hi tihhlawhtlin a nih hunah chuan hriselna kawnga kan state hmélhmang thlak danglam dâwrhtu tur a ni," a ti.

Project hnuaiah hian district thar pathuma chief medical officer pisa sak zawh tawh a nih thu sawiin Minister chuan, "District hospital hrang hrang cheiṭhat a ni a, MCON (Mizoram College of Nursing) hostel sakte leh building hluite cheiṭhat hna pawh thawh a ni," a ti a; project hnuaiah Mizoram State Health Care Scheme leh AB-PMJAY tihchangtlun mek a nih thu a sawi.

Health Minister chuan, Japan Internatonal Cooperation Agency (JICA) nen ṭangkawpin Zemabawkah Mizoram State Super Speciality Cancer & Research Centre dinna tur thuthlung ziah a ni tawh thu sawiin, "He project hi cheng vbc. 700 sênna tur a ni," a ti a, kum 2028-a thawh zawh tur a nih thu leh JICA-in kum 2033 thleng an vilpui dawn thu a sawi.

HFW Minister chuan, kum 2017-ah Mizoram infant mortality rate (IMR) chu 15 (naupiang 1,000 zelah 15 thi) a nih laiin, report hnuhnung ber kum 2020-ah chuan IMR chu 3 a nih thu a sawi a, "India ramah nausen kum khat hnuai lam thi tlem berna state kan ni," a ti.

HEALTH MINISTER SAWI DANGTE

▶ ZMC-a damlo khum 140 bawr ni ṭhin chu tihpun a ni a, khum 470 hman theihin a awm mek.

▶ ZMC-ah ICU khum 13 neih ṭhin 30-ah tihpun a ni a; PICU, NICU 25 leh ICCU pasarih nen a vaiin 72 a awm.

▶ Academic block leh hospital building cheng vbc. 189 sênga sak zawh a ni.

▶ Tertiary Care Cancer Centre project hnuaiah Cancer Hospital, Zemabawk tichangtlunna cheng vbc. 44.27 hmuh a ni.

▶ District hospital parukah khum 12 zel awmna ICU leh HDU siam a ni.

▶ Sub-centre 313, PHC 55 leh UPHC pariat, a vaiin 376-te health & wellness centre-ah hlàn kai a ni.

▶ District hospital 10-ah RT-PCR laboratory nei turin hmalak mek a ni a, Lunglei leh Champhaiah bun a ni tawh.

▶ SEDP pawisa cheng nuai 537.75 hmangin primary health facility thuam ṭhat mek a ni.

▶ Secretariat Complex-ah drug testing laboratory cheng nuai 250 sénga sak a ni.

▶ Cheng nuai 1,242,75 séngin Civil Hospital, Aizawla Cardiology department tichangtlun hna thawh mek a ni.

▶ DHME hnuaia nursing section/cell chu July 31, 2023-ah Nursing Directorate-ah hlàn kai a ni.