Health care bill bá cheng vbc. 63.88: ADB loan ṭum khata hmuh tur a ni lo

Health minister Dr R Lalthangliana'n nimina Aizawl Press Club-a thuthar thehdarhtute a kawmnaah, Mizoram State Health Care Scheme (MSHCS) hnuaiah damlote bill bá cheng vbc. 63.88 a awm thu leh, health care atana Asian Development Bank aṭanga cheng vbc. 1,000 pûk tum chu ṭum khata hmuh tur a nih loh thu tarlan a ni.

Press conference-a document an sema tarlan danin, MSHCS hnuaiah hian damlo mi 19,933-te bill bat mek a ni a, bill pawisa bat zat tling khawm chu cheng vbc. 63.88 a ni.

Financial year 2023-24 atan MSHCS hnuaiah mi 26,569 an inziak lut a, inziak lutte chu ration card aṭanga thliar hran niin, Antyodaya Anna Yojana (AAY)-ah mi 3,721, primary household (PHH)-ah mi 12,229, National Food Security Act hnuaia awm lo (non NFSA)-ah mi 10,422 leh ration card nei lo mi 197 an ni.

MSHCS chief executive officer Dr Biakthansangi sawi danin, MSHCS atana ADB aṭanga cheng vbc. 1,000 pûk tum chu peih ṭêp a ni tawh a, ADB hotute tun thlaah rawn kalin, a hmáwr bâwk theih an beisei.

Loan pûk tur hian ADB chuan Mizoram sorkar tih ve tur phût a nei a; chu'ngte chu - engtik hun lai pawhin mi zawng zawng hman ṭangkai theih tur health care scheme buatsaih leh central health care scheme-te nena kaih kawp a ni. ADB thil phût ang chu a thuphungin Mizoram sorkarin a pawm tawh.

ADB loan chu ṭum khata hmuh tur a ni lo tih sawiin MSHCS CEO chuan, "ADB lamin tih tur bituk an nei a, chu'ng kan tihpuitlin hunah chuan pawisa an rawn release zel dawn," a ti a; kum thum chhungin cheng vbc. 1,000 hmuh kim theih beisei a nih thu a sawi.