PWD JE kum 4 táng turin hrem a ni

PWD junior engineer C Lalfakawma s/o C Thangkhuma (L), Khatla South chu contractor hnen aṭanga thamna sum lak leh thuneihna hman sual vangin Special Court (Prevention of Corruption Act) chuan kum li chhung lung-ina táng tur leh Rs 2,00,000 chawi turin a hrem.

C Lalfakawma thu­buai­ah hian special judge (PC Act) Dr HTC Lalrinchhana chuan August 4, Thawhṭanni khan thutlukna siamin, thiam loh a lo chantir tawh a; nimin khan hrem dan tur (sentence judgement) tichhuakin, kum li chhung táng tur leh Rs 2,00,000 chawi turin a hrem a ni.

Sentence judge­ment-a tarlan danin, C Lalfak­awma hi Indian Penal Code (IPC) Section 409 tlawhchhanin kum hnih chhung táng tur leh Rs 1,00,000 cháwi tura tih a ni a, pawisa a chawi loh chuan thla ruk dang a tàn belh ang. PC Act Section 13(2) hnuaiah kum li chhung táng tur leh Rs 1,00,000 cháwi tura tih a ni bawk a, pawisa a chawi loh chuan thla ruk dang a tàn belh ang.

Thubuai pahniha C Lalfakawma hremnaa lung-ina a tàn hun tur chu a hranpaa kal loin, kal kawptir a ni a, chuvang chuan thubuai pahniha a tàn hun tur belh khawm kum ruk chu PC Act hnuaia a tàn hun tur kum li-ah tlâk turin Court chuan a ti a; pawisa chawi tur erawh belh khawmin, Rs 2,00,000 chawi tura tih a ni.

Pawisa chàwi tur pek loh vanga a tàn belh hun tura tih pawh belh khawmin, thla 12 (kum khat) tàn belh tura tih a ni bawk.

Special Court chuan, C Lalfakawma chu tun hmaa thubuai la nei ngai lo leh chhungkaw châwmtu ber a nih bakah, ama mimal sumpai atana a eirûk finfiah a nih loh avangin PC Act Section 13(2) hnuaiah hian hremna nêp thei ang bera hrem a nih thu a tarlang.

Court judgement-a tarlan danin, PWD deputy secretary H Thanga Zate chuan May 20, 2020 khan Mizoram Lokayukta-ah thubuai a thehlut a; C Lalfakawma chu PWD, Khawzawl Division-a JE hna a thawh laiin Rabung-Aiduzawl kawng laitu contractor Lalroenga hnen aṭangin dik lo taka Rs 17,00,000 la-ah leh sub-con-tractor Vanhmingthanga hnen aṭangin thamna Rs 3,00,000 la-ah puh a ni.

C Lalfakawma chu Khawzawla a thlen in pa leh a ṭhianpa ni bawk Vanhmingthanga, Khawzawl Vengthar tan contractor Lalroenga hnenah sub-contract hna a dilpuiah leh a dilpui anga leimin palh thei dâwl nghehna tur retaining wall siam hna pathum (Rs 21,00,000 man) Vanhmingthanga tan ruahmansakah puh a ni bawk.