LMC-in Rs 1,56,57,126 an hmu tawh

Lunglei Municipal Council (LMC) hotute chuan, LMC din a nih aṭangin kawng hrang hrangin Rs 1,56,57,126 an la lut tawh tih an sawi a; Mizoram sorkara thawktu tur an dilna a la hlawhtlin loh avangin a taka hna thawh a harsat thu an sawi bawk.

Nimin khan LMC conference hall-ah LMC hotute leh Lungleia thuthar thehdarhtute an inkâwm a; LMC chairman Lalzuithanga chuan, LMC din a nih aṭanga sum an hmuh tawh zawng zawng chu Rs 1,56,57,126 a nih tawh a sawi a; sum hmuh tawh aṭangin councillor-te hlawh atan Rs 12,08,821 leh pisa inrêlbàwlna atan Rs 14,20,893 an hman tawh thu a sawi a ni.

Lalzuithanga chuan, Mizoram sorkara hna thawktu tur an dilna a la hlawhtlin loh thu sawiin, "A taka hnathawh a la harsa. LMC bul ṭanpuitu leh thil chinchang hre ber CEO sawn a nih avang leh Secretary chu Revenue depart­ment enkawl teltir a nih avangin harsatna kan tawh phah hle," an ti a; CEO thar tun hnaiah sorkarin a pek thu leh FAO post an dil a, Lunglei Treasury officer Vanlalrosiama kawptir a nih thu an sawi.

LMC hotute chuan, LMC hmunhma tur zawn mek a nih thu leh sum senso tur chu UDPA department-in ngaihtuahsak an tum thu an sawi a, "Truck terminal siam turin NHIDCL nen indawr mek a ni a, Lunglei khawpui dái hmun pathumah Solid Waste Management Centre siam turin hmun hrang hrang kan en tawh. SWMC atan Pukpui dáiah LMC Chairman-in a ram a pe a ni," an ti. Draft Lunglei Municipal Council Regulation/ by laws paruk peih tawh a ni a, mipui en theih turin hun hawn mek a nih thu an sawi bawk.

LMC HOTUTE SAWI ṬHENKHAT

■ Lungleia parking fee khawn dan fel tâwk lo leh parking aṭanga sum lut hmanna Lunglei mipuiin an hre lo reng hi thil fel lo tak a ni.

■ LMC-in parking fee khawn turin hma a la mek a, October 2023 aṭangin LMC kaltlangin parking fee khawn theih kan beisei.

■ LMC hnuaia ward 11-ah June 2023 khan ward committee din vek a ni tawh.

■ Ward committee member atan political party tin aiawh leh tel àwma ngaihte dah a ni.

■ Sanitation leh advertisement & hoarding enkawl mektu department aṭangin LMC kutah dah a ni ṭêp.

■ Kum 2024 aṭangin property tax lak theih beisei a ni.

■ LMC-a awmze nei taka hma la tur leh hna thawk tak tak turin thawktu tur kan mamawh.

■ Thawktu dilna kan thlen UDPA-in Finance-ah an thehlut tawh a, eng emaw zat tal a hlawhtlinna kan hmuh hma chuan hmalak a harsa.

■ Mizoram sorkarin kan mamawhnate hriain thawktu min pek belh thuai se kan duh.