Teachers' Day: Zirtirtute chawimawi: Zirtirtu hna hi hna zahawm a ni - CM

Nimin September 5 kha Teachers' Day (Zirtirtute Ni) a ni a, Mizorama sikul tam takin an lawm a, zirlaite'n an zirtirtute an chawimawi. Chief minister Zoramthanga chuan Mt. Carmel School-in Teachers’ Day an lawmna Lammualah hmanpuiin, zirrtirtu hna chu hna zah­awma nih thu a sawi.

Teachers' Day-ah hian sikul tam takah chuan zirlaite'n an zirtirtute hnenah chawimawina leh thilpek an hlan a, sikul ṭhenkhatah chuan zirtirtute'n zirlaite hnenah thilpek an hlan ve bawk. Sikul eng emaw zat chuan Day pualin intihhlimna hun an hmang.

CM Zoramthanga chuan, Mizorama zirtirtu zawng zawng Teachers’ Day chibai a bûk a; zirtir­tute pawimawhna sawiin, "Naupan lai aṭanga min kaihruaitu zirtirtute hi kum a lo veiin an hlutzia kan hriat chhuah belh zel ṭhin. Zirtirtu hna hi hna zahawm leh chawimawi phú a ni," a ti.

Chief Minister chuan, zirtirtute chu ram nghah­fâk naupang leh ṭhalaite an kaihhruainaah theih­tawp chhuah chhun­zawm zel turin a chah a; zirlaite pawh mahni inhnehna nun nei tura fuihin, ruih­hlo lakah fihlim tlat turin a chah.

Zoramthanga chuan, Mizoram chhehvel state leh ṭhenawm rama buaina chhuak vanga sahimna zawnga Mizoram rawn lutte tuamhlâwm tura khawtlang, kohhran, páwl leh mimal hrang hrang hmalaknate lawmawm a tih thu leh, chutiang zawnga Mt. Carmel School-in hma an lo la chu lawmawm a tih thu a sawi bawk.

Teachers' Day hi India President hlui Dr Sarvepalli Radhakrishnan pian champha, September 5-ah lawm ṭhin a ni a, kum 1962-ah hman ṭan a ni.

Dr S Radhakrishnan hi mithiam, zirna lama thawh hlâwk tak a ni a, India vice president hmasa ber niin, kum 1952 khan vice president a ni ṭan a, kum 1962 aṭangin President a ni leh a, India President pahnihna a ni. President a nih lai, kum 1962 aṭangin a pian champhaah Teachers' Day hman ṭan a ni.

Kum 1888-a piang S Radha­krishnan hi kum 1931-1936 chhung Andhra University vice chan­cellor a ni a, kum 1939 aṭangin Banaras Hindu University vice chancellor a ni leh bawk.Kum 1954-ah Bharat Ratna a dawng a, British Royal Order of Merit honorary member a ni. Kum 1917 khan 'The Philosophy of Rabindranath Tagore' tih lehkhabu a chhuah bawk.