Education Minister hoin E Lungdar Zirna Centenary lawm
East Lungdar khua chuan nimin khan Thangburha Hall-ah East Lungdar Zirna Centenary (kum 100-na) an lawm a; School Education minister Lalchhandama Ralte-in a hmanpui a, MNF sorkar chhungin zirtirtu 2,700 chuang lak a nih tawh thu a sawi.
School Education Minister chuan, East Lungdar khuain zirna kum 100-na an lawm chu ropui a tih thu sawiin, "Zirna dah sang khua hi engtik lai mahin an tê ngai lo ang. Zirnaah hian ram mamawh chhànna pe turin chhungkua leh khawtlang hian zirna hi number one-ah kan dah a ngai. Mizoram sorkarin zirna ngaih pawimawhah a neih avangin sum harsa leh hripui karah zirtirtu 2,700 chuang lak a ni tawh," a ti.
Lalchhandama Ralte chuan, naupangte'n Mizo nunphung an hriat nan Zonun tih chu zirlaibuah hman a nih thu a sawi a; zirlaite chu Pathan ṭihna nen lehkha zir tur leh zu leh ruih theih thila inhmang lo tur te, mipat hmeichhiatna hman khawlohna laka inthiarfihlim turtein a chah.
East Lungdar Zirna Centenary lawmna hi September 4, Thawhṭanni zan aṭanga nizan thleng khan neih a ni a; Bazar kàwnah centenary lungphun an siam chu Nuchhuni (kum 101)-in a hawng. Zirna lama mi hlawhtlingte, zirnaa mi hmasate leh state award to teacher 2023 dawngtu hnenah chawimawina an hlan a ni.