KHAWTHLIR

ANC-in thisen pe

Aizawl North College NSS unit chuan nimin khan an college-ah thisen pek an huaihawt a, mipa 51 leh hmeichhia 18-te'n Civil Hospital, Aizawl tan thisen unit 69 an pe. Aizawl North College NSS hian August 4, Thawhṭanni khan thisen unit 71 an lo pe tawh bawk.

Heroin man

Excise & Narcotics dept. chuan nimin chawhma dar 10:10 khan Serchhip P&E Vengah heroin gram 915.400 (hawng 79) an man a, a neitu nia puh Assam lam mi pali - Md. Muslek Uddin (23), Abul Khayer Mohammed (37), Sahin Ahmed (27) leh Sirajul Hoque (25) leh, Tripura mi Abdul Karim (35) te an man nghal a; heroin phurhna lirthei Mahindra Bolero AS-11 V-5670 leh Maruti Alto K10 AS-10 B-1115 an hréng bawk.

Lehkhabu tlangzarh

K Remruatfela ziah 'Mizoram Politics Bihchianna' tih lehkhabu chu Assembly speaker Lalrinliana Sailo-in nimin khan a pisaah a tlangzarh.

MCSSCA Sports

Mizoram Civil Servicers Sports & Cultural Association (MCSSCA) chuan nimin khan Mizo High School Multipurpose Hall-ah Annual Sports Meet vawi 34-na an hmang a, chief secretary Dr Renu Sharma, MCSSCA patron ni bawkin a hmanpui. Sports Meet hi kum 1988 aṭangin neih ṭhin a ni a; kumina Meet hi September 8, 2023 thleng awh tur a ni.

Pre-recruitment Training buatsaih

Assam Rifles chuan kumin August 4 aṭanga September 2 thleng khan Mizorama khaw hrang hrangah Mizo ṭhalai, sipaia luh tumte tan Pre-Recruitment Training an buatsaih a, Mizo ṭhalai 87 an tel. Physical test leh endikna hrang hranga pawimawhte tihpuia zirtir an ni.

Bungrua sem

Lunglei High Powered Committee vice chair­man Lawmawm To­chhawng, MLA chuan nimin khan Lunglei Bethel Centre-ah UDPA department, City Mission Management Unit, Lunglei ULB-te hmalaknain Lungleia home panga hnenah bungrua a sem.