LAD directorate sak thar hawn a ni

Local Administration department (LAD) minister K Lalrinliana chuan nimin khan MINECO-a LAD Directorate in sak thar a hawng. Minister chuan, VC hrang hranga hmasawnna ruhrel siamah sum awm ang ang ṭangkai taka hman ṭhin a nih thu a sawi.

LAD Directorate hi New Economic Development Policy (Congress sorkar laia NLUP chhunzawmna) aṭanga dah cheng nuai 600 hmanga sak a ni a, Zothan Consultancy Services, Luangmualin December 15, 2019-ah an sa ṭan a, July 2023-ah luah luh a ni.

LAD Minister chuan, village council hrang hranga hmasawnna ruhrel siam kawngah fund neih ang ang ṭangkai taka hman ṭhin a nih thu sawiin, "LAD hnuaia thawktute'n indaih lohna leh duhkhawp hmanraw neih lohte chhuanlama hmang loa theihtawp chhuaha mawhphurhnate an hlen ṭhin hi a ropui hle a ni," a ti.

K Lalrinliana chuan, LAD pisa thar chuan ram leh mipui rawngbawlnaah tih tak zetna leh Pathian hre reng chunga thawk tura inpekna thar siam se a duh thu a sawi a, Aizawl DLAO pisa pawh Directorate kiangah SASCI suma sak tumin hmalak a nih thu a sawi bawk.

Hawnna inkhawmah hian MLA K Laldawngliana, LAD secretary Teresy Vanlalhruaii, director Rita Lalnunmawii Pachuau leh development engineer PC Lalrinawma te pawhin thu an sawi a ni.

LAD MINISTER SAWI DANGTE

* VC 243 hnenah computer pek a ni tawh.

* Thenzawlah Handloom Design Training cum Production Centre siam a ni.

* Tuipui Darzokaiah Rural Homestay & Agro Tourism siam a ni.

* Kolasib district-ah kuhva káwr aṭanga plate siamna din a ni.

* VC House eng emaw zat siam a ni a, SIRD nen ṭang dunin district-ah District Panchayat Resource Centre sak a ni.