Champhai district chhungah Police dah belh a ni ang - DGP

Director General of Police (DGP) Anil Shukla chuan nimin khan Champhai a tlawh a; Champhai district-a police indaih lohna sukiang turin police dah belh a nih tur thu a sawi.

Anil Shukla hian Champhaia police station hrang hrang a tlawh bakah, khawtlang hruaitute a kâwm. Khawtlang hruaitute'n police indaih lohna leh dan leh thupek kenkawh kawnga hmasawnna tur an lo thlen chungchangah DGP chuan, "Champhai district-a police-te indaih lohna pawh sukiang turin police dah belh a ni ang," a ti.

DGP chuan, Champhai district-ah police leh khawtlang inkarah thawh­hona ṭha tak a awm thu sawiin, "Police chu sorkar leh mipui thlun zawmtu pawimawh tak a ni a, police thâ tichak turin khawtlang hruaitute nena thawhhona a pawimawh hle," a ti a; Manipur leh Myanmar buaina karah ralmuang taka Champhai district a awm thei chu lawmawm a tih thu a sawi.

Champhai district-in harsatna a tawh lian tak chu ruihhlo tawlh a nih thu sawiin DGP chuan, "Ruihhlo tawlh hi ngaih pawimawh zual a ṭul hle. Kan fate leh nakin thlenga khawtlang hmélhmang tidanglam thei tur a nih avangin ruihhlo do kawngah ṭanho a, ṭan lak chhunzawm zel a ṭul," a ti bawk.