India dinhmun tiderthâwngah BJP puh
Mizoram Pradesh Congress Committee (MPCC) chuan thuchhuah siamin, prime minister Narendra Modi kaihhruai hnuaiah India dinhmun leh state hrang hrang inzawmkhawm a nihna a derthâwng mek zel niin an tarlang.
MPCC chuan, Rashtrapati Bhawan-in September 9, 2023-a G20 Dinner a buatsaih tura sawmnaah, President of India tih aia President of Bharat tih a nih thu an tarlang a, "Hei hian Constitution-a Article 1-a 'Bharat, India chu Union of States' a ni ang a tiha 'Union of States' chu derthâwngah a siam a ni," an ti.
BJP kaihhruai hnuaiah sorkar official thilah 'India' tih aia 'Bharat' an hmang ṭhin chu India rama Hindu lentir tumna kal zel nia sawiin MPCC chuan, "BJP sorkar Narendra Modi kaihhruai hian history her kawi danglama India ṭhendarh an tumna leh Hindu rama siam an tumna chak takin an kalpui mek reng," an ti a, Kristian tan a him lo hle niin an sawi.
BJP chu mipui thlan sorkar namnûla paihthlâk chíngah puhin MPCC chuan, "Hei vang hian by-election 436 lai kum 2014 hnuaah parliamentary leh assembly constitutency-ah a awm phah tawh. BJP-te thuneihna âtchilhna hian kan politics tikhawlo tawhin, Anti-Defection Law pawh hman tlak lohin a chhuah tawh a ni," an ti.
Congress party chuan, BJP chu 'One nation, one election' barhluih tum mekah puhin, "One nation, one law (Uniform Civil Code) an buaipui mek a, tun ang renga thil a kal chuan 'One nation, one religion' pawh an la ti duh mai ang. New Education Policy hmangin 'three language formula' kalpui an tum mek a, 'One nation, one language' pawh an thil tum bul ber pakhat a ni," an ti bawk.
Mizo ram, hnam leh sakhua a him theih nan leh India ram khawi hmunah pawh sakhaw zalenna a awm theih nan Congress party lo chu Mizote'n duh thlan tur an nei lo niin MPCC chuan an tarlang.