MZU-ah fintech chungchang zirho

Mizoram University leh The Innovation and Technology Foundation, IIT-Bhilai (IBITF) chuan September 4, Thawhṭanni aṭang khan MZU-ah 'Fintech Ignite - Workshop to Empower Innovation and Entrepreneurship in Fintech for North Eastern India' an buatsaih a, vawiinah zawh a ni ang.

Zirhonain a tum ber chu, financial technology (fintech) - online hmanga sum chêt kualtir velna lam kaihhnawiha technology thar siam/hmuh chhuah leh, fintech hmanga sumdawnna hlâwk zawka kalpui dan tur zirho a ni a; workshop-ah hian hmarchhaka zirtirtu leh zirlaite thlur deuh bik a ni.

MZU School of Engineering & Technology dean Prof. Sudipta Chattopadhyay chuan, "Kan ram hian technology kan ban phâkah dahin, mahni kutkawih ngeia technology lam thil siam chhuah a pawimawh a, India ram pawh technology lamah tihmasawnin, kan siam chhuahte chu ram dangah zau zawkin kan hralh chhuak thei dawn a ni," a ti.