Mizoramah Teachers' Day lawm a ni

Nimin September 5 khan Mizoram hmun hrang hrangah Teachers' Day (Zirtirtute Ni) lawm a ni a, sikul tam takah zirlaite'n an zirtirtute hnenah chawimawina leh thilpek an hlân.

Teachers' Day hi ram hruaitute'n hmun hrang hrangah an hmanpui a; minister Lalrinawma chuan Khumtung Post Matric Union-in Khumtung community hall-a Zirtirtute Ni an lawmna a hmanpui a, khawtlang leh ram leh hnam tan inpek tharna ní atan hmang ṭheuh tura zirtirtute sáwmin, "Kan ram nghahfâk zirlaite zirtirnaa thawktu zirtirtute hi an fakawm tak zet a ni," a ti.

Lalrinawma chuan, Mizo ṭhalaite leh zirlaite ruihhloin a rún mek tih sawiin, "Ruihhlo donaah mi tinin mawhphurna kan nei," a ti a; ruihhlo donaah theihtawp chhuah ṭan tlan zel a ṭul thu a sawi.

MLA H Lalzirliana chuan New Diamond School, Mamit-in Chhimveng YMA Hall-a Teachers' Day an lawmna a hmanpui a, New Diamond School hnenah computer pali a pek bakah, zirlai khawm zawng zawng hnenah thilpek a hlàn.

H Lalzirliana chuan, zirtirtu ṭang laite leh pension tawhte chibai bûkin, duhsakna a hlàn a, "Khawvela mi ropui leh mithiamte hi zirtirtute kutchhuak an ni," a ti a; zirna-ina hnam làm inzirtir te, tlawmngaihna, aia upa zah, mi dangte ṭanpui inzirtir uar leh Mizo kan nihna zahpui loa chhuang em em zawk tura inzirtir uar turin zirtirtute a chah.

Kolasib-ah chuan Venglai Bazarah a huhoin Zirtirtute Ni lawm a ni a, zirtirtute chawimawina hun hman a nih bakah, kawngzawh buatsaih a ni. Kolasib district education officer K Lalsiamliani kaihruai inkhawmah Kolasib All NGO Coordination Committee chairman Thomas D Lalengliana'n thu a sawi a, "Zirtirtute hi mipui vantlang innghahna bulpui an ni a, an ropuiin an mawhphurhna pawh a sang hle a ni," a ti.

Kolasib-ah hian MZP leh MSU kaihhruaiin Kolasib-a sikul hrang hranga zirlaite'n an zirtirtute chawimawina thuziak kenga kawng an zawh a, zirtirtute chawimawi nan an aurual. Teacher's Day puala inkhawmah zirtirtu ṭha thlan chhuahte hnenah chawimawina hlan a ni bawk.

Teachers' Day hi Khawzawlah pawh Zaingen Veng Hall-ah a huhoa lawm niin, additional DC Lalfakzuala khuallian a ni a; khuallian leh Khawzawl Joint VC chairman K Vanlalsiama ten thu an sawi. Khawzawl district-a State Teachers Award dawng tawh mi pahnih hnenah chawimawina hlan a ni.

Hnahthialah pawh District Committee on Teachers’ Day 2023 huaihawtin Hnahthial Middle School-ah Teachers’ Day lawm a ni a, bawrhsap Chuauhnuna'n a hmanpui. Zirlaite'n intihhlimna hun an hmang a; kum 2022-23 chhunga Hnahthial district-a zirtirtu ṭha ber chawimawina chu H Zodingpuia, Hnahthial H/S zirtirtu hnenah hlan a ni.