AR insawnna tur MoU chungchangah MHA aṭangin chhànna a la awm lo
Aizawl khawpui lai aṭanga Assam Rifles insawn chhuah tura Mizoram sorkar leh Assam Rifles ten memorandum of understanding (MoU) an duan (draft) chungchangah Ministry of Home Affairs (MHA) aṭangin chhanna dawn a la ni lo.
Vanglaini thu dawn danin, Assam Rifles leh Mizoram sorkar hian Aizawl khawpui aṭanga AR-te an insawn chhuah theihna tura ṭul leh pawimawh hrang hrangte an duang dun a, an pahniha duh dan tarlan ve ve a nih hnuah draft MoU an ziak a ni.
Draft MoU chu MHA hnenah thawn a ni a, an thawnna rei tawh mah se, MoU chungchangah Assam Rifles chuan tun thlengin MHA aṭangin thu dawn an la nei lo. Draft MoU hi MHA-in ṭha an tiha an pawm hunah MHA leh Mizoram sorkarin MoU an ziak ang.
Hetih lai hian, Assam Rifles-te chuan Aizawl khawpui chhung, Lammual leh a chhehvel aṭanga Zokhawsanga an insawn hunah pawh tuna an luah ram chu chhuahsan kim vek an tum lo.
Thu dawn danin, Assam Rifles-te hian insawn chhuak tur chuan kum hnih leh a chanve vel mamawhin an inhria a; an chhuah fel hmain draft MoU-a Mizoram sorkar tih tura tarlante tihhlawhtlin vek an phût bawk.
Assam Rifles-te hian Aizawl khawpuia an hmun chhuahsan loh tura an duh zingah hian Quarter Guard leh Loch House a tel a; hei bakah hian Zokhawsangah sikul din a nih hma chuan Lammual bula an sikul chu chhuahsan an tum lo.
Tun dinhmunah Assam Rifles-te hian Zokhawsang panna kawng chu ṭha tâwk loa an ngaih bakah, insawn phei vek turin tui leh power supply an mamawh ang sorkarin a ruahmansak loah an ngai. Hengte hi Mizoram sorkarin a chinfel hmasak phawt loh chuan insawn chi-ah an ngai lo nia thu dawn a ni.
Hetih lai hian, Assembly session neih zawh tâkah khan Home minister Lalchamliana chuan, Assam Rifles-in Aizawl khawpui laili aṭanga Zokhawsanga insawn chhuah loh dan an dap thu leh, an chhuah theihna tura MoU an duanah pawh thil harsa a la awm thu a sawi.