Lumpsum HSS pakua khâr tihtawp a ni; Cabinet thutlukna an ngaichâng dawn

Mizoram Govt. Lumpsum Aided Higher Secondary School Association (MIGLAHSSA) chuan an sikulte dinhmun sang zawka dah an phût vanga August 29, 2023 aṭanga sikul an khâr chu chief minister Zoramthanga an hmuh hnuah nimin khan an titàwp a, vawiin aṭangin sikul an kal leh ṭan dawn.

Lumpsum HSS pakuaa managing board chairman-te chuan nimin khan CM Zoramthanga chu a pisaah an hmu a, lumpsum grant-in-aid aṭanga adhoc grant-in-aid dinhmuna hlàn kai an phût chungchang an sawipui a ni.

School managing board chairman-te chuan, an sikulte chu khaw­tlangin an hahpui rei tawh­zia leh adhoc grant-in-aid an mamawhzia te, kum 2018 inthlan hmaa tuna sorkar (MNF kaihhruai) hotute intiamna anga tihhlawhtlin a nih loh chuan inthlan dawna hmalak a harsat dan turte an sawi.

Chief Minister chuan, sikul hrang hrang dinhmun sang zawka hlàn kai chungchangah tunah chuan thu chiang a la awm loh thu leh Cabinet-in a la ngaihtuah tur a nih thu a sawi a; lumpsum aided school pakua khàr mek chu titawp turin a lo ngen.

Managing board chairman-te leh MIGLAHSSA hruaitute chuan Chief Minister ngenna chu zahawm an ti a, Cabinet thutlukna ngaichâng chungin September 7, 2023 (Ningani) aṭangin lumpsum HSS pakuate chu hawn leh phawt ni se, an ti a ni.

Tarlan tawh angin, MIGLAHSSA hian adhoc grant-in-aid dinhmuna hláng kai tura sorkar kar nan August 28, 2023 khan No Teaching Day an hmang a, August 29 aṭangin tiam chin awm loin sikul an khàr a ni.

Kum 2018 laihâwl vel khan tuna an phût ang tho phûtin ni 41 chhung sikul an lo khâr tawh a; sikul bakah, an awmna khua ṭheuha sorkar pisate leh kawngpui an dang tawh bawk.