Zirlai ni chunga mahni inchâwm mi 3-te SSU-in chawimawina an hlan

Students’ Self-Support Union (SSU) chuan zirlai, mahni intodelhte hnena chawimawina an hlan ṭhin, Self-Support Award chu September 5, Thawhlehni khan Lalchamzuali, Ngopa, Lalhmachhuani, Zuangtui leh Lalhmangaihsanga, Bairabi-te hnenah an hlân.

Self-Support Award hlanna inkhawm hi Ignite Studio-ah buatsaih a ni a, Rajya Sabha MP K Vanlalvena'n a hmanpui. Award hian Rs 20,000 leh thuchei a keng. SSU hian zirlai ni chunga mahni inchâwm a, an zirna senso leh chhungkaw pawimawh tur sum thawk chhuaka intodelh theite hnenah kum 20 chuang chawimawina an lo hlan tawh ṭhin a ni.

Khuallian K Vanlal­vena chuan, college an kal laia mi in luaha mahni inchâwm ṭhin a nih thu sawiin, SSU hmalakna chu ropui a tih thu leh a ngaih pawimawh thu a sawi a, "Ngaihsan tur dik ṭhalaite'n kan ngaihsan a pawimawh. Mi tu pawh mai hian kan thinlunga kan tum tak tak chuan tih theih loh tak tak a awm lo. Zirlai harsa tak leh mahni inchâwm chawpa lehkha zirte hian hlawhtlinna rahbi pawimawh an rap a ni," a ti.

SSU president Darhmingliana chuan, SSU chu zirlai ni chunga mahni intotelh chawisangtu, hah taka an thawh chhuah leh mi ṭha­hnemngaite inpekna vanga hma la ṭhin an nih thu a sawi.

SELF SUPPORT AWARD DAWNGTUTE

◉ Lalchamzuali, Ngopa: J Thankima College-a BA fifth semester zirlai a ni a, Chaltlangah in a luah. A chhungte tibuai loin college a kal aṭangin a intodelh ṭan a, hun âwl a neih apiangah a remchang ang ang a thawk a, mi in leh a vel tihfai te, nau awm leh insûk te, mi huan thlawh te, college building leh campus tifaitein a inhlawh ṭhin a. Ama zirna tur bakah a naute zirna tur a tumsak.

◉ Lalhmachhuani, Zuangtui, Aizawl: A pu bula khawsa a ni a, pawl 9 a zir lai aṭanga intodelh tum a ni. Sikul kal pahin tuition pek, nau awm, mi in tihfai, la hlûmtein a inhlawh ṭhin a; online shopping hmangin a theih ang angin sum a tuak bawk. Kum 2020-ah civil engineer zir turin a tling a, admission leh kal man tur a intuak daih hnuah Ahmedabad a pan a, LD Colllege of Engineering-ah civil engineer a zir mek. Ahmadabad-ah pawh Mizo chawhmeh zawrhna hmunah a inhlawh ṭhin.

◉ Lalhmangaihsanga, Bairabi: Kolasib College-a third semester zir mek a ni. HSLC a zawh hnuah Kolasib-ah a zir zawm a, chhungte belh tur a neih loh avangin mahniin in a luah. In luah man leh a zirna senso amah a intum vek a; sikul chawlh leh exam chawlhahte inhlawhin a rem rem a thawk. In sakna, cement leh leirawhchan hlàn thlâk, gas sem leh chanchinbu semtein a inhlawh ṭhin.